本帖最後由 mickey7100 於 2011-1-20 15:31 編輯
今日去咗中環趙x律師行交文件,我一早已copy哂所有有需要既文件,所以交既時候都好順利,而收文件個女仔都好好.
佢講要咩我都有copy,糧單同水、電、煤、電話費、上網費啲單都只係要最近既一個月就得,佢完全冇要我俾銀行既statment.租約反而我問番佢要唔要,佢先話要{:4_180:}
而份表都有小小填錯同填漏,佢幫我補填番再俾我加簽.生活費佢只係cut我租金(因依家呢個金額係有小小唔合理,但冇計想搬平啲但搵唔到),而佢都好客氣話盡量搵番平啲租既屋.另膳食原本我填$5000(我計我+仔+媽咪),但佢話只可以俾$4500,.跟住話電費好似填多咗,佢同最近既一期,我話呢2個月因唔駛開冷氣所以用得少,跟住就冇改...總數支出都大過我收入,所以唔駛還.
佢話嚟緊呢4年如果有任何改變就通知佢地,跟住佢俾張電話/地址既紙我,我問係咪呢4年都係佢地跟我,佢話係(証明係直接外判).除咗去旅行(特別要搭飛機)要通知佢地外,基本上探親/醫病...都唔駛通知,另如果公司出trip最好所有單據唔好寫我名就冇問題.另我有份醫保,呢個月底到期,我講咗一啲原因問可唔可以俾我繼續(唔係我俾錢),但佢話真係唔得,因破產人士係唔可以買任何保險,跟住要我簡單寫張証明我呢個保險到期後會自動取消,亦無任何現金價值...等等
最後佢問我開戶定解凍,我話check咗個戶口已取消,所以要開戶.跟住好快就俾咗2封信我, 一封係佢地叫銀行俾我開戶口,另一封係破署証明呢間係佢地指定認外外判,一切佢地出既信都有效.
過程都好順利,可能我準備充足,又冇咩特別要求,而生活費我都覺得ok(佢地冇咩都話要cut),講真比起之前左手嚟,右手去既日子已經好好多.總之順順利利/安安全全咁渡過呢4年,最緊要保重身體唔好病{:4_209:} 咁就滿足.
好多謝曾經係到答過我問題既人,亦好彩有呢個網,令到我已經有咩心理準備,所以由申請到今日交文件我都好順利:loveliness: |