破產生活費實際問題．

kabon

１０年幾前捱到唔洗破，而加自己年紀唔細無咩搵錢能力，遲下真係要破了，但有尐嘢想請教呢度師兄．

１．如果破咗之後每個月搵得萬三四蚊，獨居劏房，無親人，每個月人工扣咗支出後都要清還，假如而加業主唔租的話我要再出去搵劏房住，何來２按１上?
之前住落果度有按金都無用，我要租到新既先可以退舊．

2．如果個個月清袋，電話壞咗想買部千零二千蚊既電話whatsapp都無.唔好彩失業又何來錢上繳? 病咗連睇醫生錢都無?

攪到咁不如唔好破，走數算? 反正一窮二白，劏房四圍都係．我又無欠黑財果尐，洗死咩(其實死都無乜所謂，最緊要死舒服）最壞打算咪入去受幾個月．

p.s.其實我無咩不良啫好，只係搵錢能力低，搵得萬零蚊，個個月交５，６千比業主住幾十呎，２０２５物價更加嚇死人，自己有情緒有尐問題，
有時停咗工一兩月借錢渡日，結果又硬住頭皮去做．慢慢又借落．其實至少我都為香港既地產業貢獻過呀！唐樓四十幾蚊一呎租．
而加經濟差反而生活成本仲年年提高，根本預算唔到可以點還．

nakamura

樓主可唔可以講下你依家幾大？欠幾多同打咩工咁低收入呢？

kabon

4x ,快5了。銀行欠10，親人10幾（上年第一次問親人借完斷絕關係唔會聯絡）基本上無可能還得完。10幾年前睇私家醫生話我有憂鬱症，食過半個月藥之後
副作作太勁唔會再食．之後就做尐基層保安工咁上下．成日失眠好麻煩，加埋而加輸入好多外勞，難撈咗．

Reborn818

其實師兄重點想問大家咩呢？四十幾五十歲，欠二十萬左右，我覺得其實勤力啲做兩份好快清晒吧

kabon

Reborn818 發表於 23-7-2025 10:29
其實師兄重點想問大家咩呢？四十幾五十歲，欠二十萬左右，我覺得其實勤力啲做兩份好快清晒吧 ...

如我第一個po所講再簡化，個個月上繳個個月清，基本上有事起嚟係無錢可以用．

kabon

Reborn818 發表於 23-7-2025 10:29
其實師兄重點想問大家咩呢？四十幾五十歲，欠二十萬左右，我覺得其實勤力啲做兩份好快清晒吧 ...

我有能力做兩份工就唔洗借，我以前做工好搏，而家有足底筋膜炎，同埋＂失得哥＂勞損．

Reborn818

kabon 發表於 23-7-2025 10:33
如我第一個po所講再簡化，個個月上繳個個月清，基本上有事起嚟係無錢可以用． ...

其實假設破產後收入都係萬四，五，仲要租屋的話，基本上都唔會要上繳啦。
一般單身唔計租，生活費會批一萬蚊左右，如果仲要交租，邊仲使上繳。

kabon

Reborn818 發表於 23-7-2025 10:59
其實假設破產後收入都係萬四，五，仲要租屋的話，基本上都唔會要上繳啦。
一般單身唔計租，生活費會批一 ...

謝謝師兄回覆:handshake
題外話講尐好笑嘢，講開租劏房，好多業主係唔會打厘印，你無厘印唔租就下位，但無打厘印既租約呢又不被承認為有效，之前搵工要地址証明就麻煩喇．
呢個政府以至好多香港人呢就以遍概全既，可能有一個呃就等於全世界都係呃，每樣嘢都要麻煩你，折磨你一餐，你放棄仲好，我又做少尐嘢．
之所以開帖問問題係因為多謝政府新法例，劏房租金忽然颷升，當我仲諗緊每月交租食飯搭車為生活就無錢剩，做人為乜之時，破產的話仲要上繑?
賣腎都唔掂呀!
我都費時諗之後破會點，佢唔信就告我囉，有時諗入去受唔駛煩居住呀，不過夏天應該係好難頂．
哈哈，吐下苦水，唔好見怪．．

OTTO

早前我都比人收樓 諗住揾啲劏房平平地 我睇過2-4千蚊 幾個盤(真心訓天橋底可能仲好)
係啲5-6千先 免強格硬 迫自己接受， 咬實牙關諗住租啦 媽個閪原來要2按1上
租間咁既棺材房都要放低2皮 果一刻我面都青撚埋，個銀包加埋銀仔 比埋張八達通都攪唔掂
焗住返深圳租 開頭驚自己唔習慣 住住吓又幾爽喎 仲正過係香港住
我依加間野2600蚊租 水電WIFI全包 300幾呎(佢話34方) 1房1廳 算係半新樓(好似香港果啲服務式住宅)
近關口果啲好鳩貴 揾啲2.3個地鐵站果啲平靚正
搭地鐵/大巴2蚊去到關口 趕時間風落雨咪用手機APP打順風車十零蚊
早餐十蚊八蚊 有腸粉有豆漿，午飯打個2送飯快餐 十幾廿蚊，
晚飯我通常去大排檔炒炒下 炒個菜30幾蚊 隊幾支大啤8蚊/支 ，我通常去格離店仔買5蚊/1支大啤)
係大陸食包煙十幾蚊，係香港百鳩幾銀，我返工都帶2包煙 開左既(每包十幾支，唔開比海關周到罰5舊)
我依加飲飲食食 交埋租 都係大約一個月8千蚊開支，一個月開一個星期裝修都有錢剩。早2個月 做外牆洗水 濕左部電話灣鳩埋 係大陸買台2手 I風12   2千蚊人仔
我同你既情況好相似，師兄你諗諗我依條路 岩唔岩你

Reborn818

kabon 發表於 23-7-2025 11:32
謝謝師兄回覆
題外話講尐好笑嘢，講開租劏房，好多業主係唔會打厘印，你無厘印唔租就下位，但 ...

師兄有冇申請公屋呢？其實你有憂鬱症病歷，應該走返去政府醫院跟進，醫院入邊有醫療社工，佢哋會睇吓有咩嘢可以幫到你。
香港土生土長應該好好，盡量用香港嘅資源，基本上唔使客氣喎。
如果真係身體不適宜工作太多，你搵社工傾吓，然後計吓數做少少，跟住攞職津好過。
其實如果條數唔係大，我反而建議你走數唔好老破（十萬搞咩老破，邊值得），香港邊有錢債監坐，哈哈，你就想啦。

kabon

OTTO 發表於 23-7-2025 11:39
早前我都比人收樓 諗住揾啲劏房平平地 我睇過2-4千蚊 幾個盤(真心訓天橋底可能仲好)
係啲5-6千先 免強格硬  ...

我識得有個阿伯，佢都好不忿要比咁貴租，所以係租深圳唔知邊度租屋住，但每日返１２個鐘工，加埋返放工來回加埋可能每日１５－１６佪鐘，結果係佢返工夜晚＂合眼訓＂，比人捉到之後炒咗．
其實每日訓工來回兩三個鐘係唔多正常．搭車是唔計收入的．．．．．

OTTO

kabon 發表於 23-7-2025 11:45
我識得有個阿伯，佢都好不忿要比咁貴租，所以係租深圳唔知邊度租屋住，但每日返１２個鐘工，加埋返放工來 ...

住得係深圳 就搵返啲近香港關口既工啦
我依加做裝修都係返九龍新界，過海都唔做
依加我靜係返工果陣食個叉雞飯 已經唔想係香港消費
我都40歲咯 你大我幾年啫 唔洗咁快話自己呀伯掛 我仲好積極架 仲會去下揼骨 KT威

kabon

Reborn818 發表於 23-7-2025 11:43
師兄有冇申請公屋呢？其實你有憂鬱症病歷，應該走返去政府醫院跟進，醫院入邊有醫療社工，佢哋會睇吓有咩 ...

其本上而加收入少咗，生活成本越嚟越高，遲早入不敷支，會一直借都唔定
哈，講番你講果尐，我成世人黑到．．連剩番一兩個朋友都係咁講：
憂鬱症病歷係我連續三日訓唔到覺去睇私家，佢同我傾咗陣話我有咁既問題，醫生話我唔係突發性，應該長期有咁既問題，寫紙比我去政府睇，我一口拒絕，一陣的咗去青山咁點算?之後就一直係咁．．．加埋果陣曾幾何時有試過去考尐超低級公務員位，比人知道有咁既病一定唔會要．

至於公屋呢，我講其中又一樣又黑又好笑既嘢比你聽（其中一樣咋）：
輪咗十幾年公屋，明明排緊隊儲分，呀署長忽然又改政策話單人輪候要從新計過分，好啦咁咪又從新輪過囉，
係果段時間呢，我每個月交租連食飯大概１萬鬆尐，銀行分期月還兩千幾，申請公屋單人入息限額無記錯係１萬１千幾，所以係超咗額既，
有一日收到房署封信話要審查我入息，我睇完就丟咗佢，唔知而加仲有無我記錄呢?
btw 多謝你同我傾計!

kabon

OTTO 發表於 23-7-2025 11:49
住得係深圳 就搵返啲近香港關口既工啦
我依加做裝修都係返九龍新界，過海都唔做
依加我靜係返工果陣食個叉 ...

師兄你做裝修，估計應該有１千蚊１工，車費對你嚟講緊梗係無問題啦!
仲未計返工收工時間無咁執著呢．
我以前屋企都係做裝修，不過我有濕疹做唔到，剩係泥水開英泥尐灰飛咋，幾個鐘之後就周身痕，下午開始有尐位紅同腫，天拿水都一樣，我死鬼老豆既反應係＂屌！你真係無撚用!{:1_1:}

Reborn818

kabon 發表於 23-7-2025 12:05
其本上而加收入少咗，生活成本越嚟越高，遲早入不敷支，會一直借都唔定
哈，講番你講果尐，我成世人黑到． ...

其實睇完師兄你所講，我真係又唔覺得同黑唔黑有絕對關係，似乎對某啲事情嘅認知影響比較大（希望咁講，你唔好嬲）
憂鬱症又點會入青山？如果係嘅話就大撚鑊，起多個赤鱲角機場咁大都睇怕唔夠住，入得青山嗰啲基本上已經係精神科最高級別，有極度攻擊性，要同社會隔離，仲一般要家人簽名同意，仲要有法官判先可以入去住。其實如果私家醫生肯寫紙去睇政府，已經真係證明咗你嘅病情要長期跟進，所謂精神科，唔一定代表所謂嘅黐線佬先要去睇，如果政府醫院跟開，醫生認為你嘅病情及資格，可以俾你攞嗰個基本傷殘津貼同兩蚊搭車，同我曾經聽過社工講如果長期病患，排公屋好似有條快隊的（申請與證明一定要政府醫生私家醫生福利署係唔會受理）
至於申請公屋嗰度，其實照我所知，如果係單身又唔夠65歲，分分鐘個個都要等10幾年（屋企個乞兒婆有親人開餐廳，有時我會過去義務幫佢搞下啲IT嘢，所以間中都會同佢啲夥計吹吓水，有時都會講下八下關於申請公屋同社會福利既野），唉，佢再寄信俾你做入息審查，好似已經係到最後階段，因為始終你第一次申請同到而家已經咁耐，所以要再審查更新資料，聽講如果你過咗入息，可以半年後再審查多一次，到時唔過就冇問題。單人公屋月薪上限，我剛剛查而家喺13090，或者你搵日上房屋署問吓，睇吓而家有冇搞得返？

欠一百萬

OTTO 發表於 23-7-2025 11:39
早前我都比人收樓 諗住揾啲劏房平平地 我睇過2-4千蚊 幾個盤(真心訓天橋底可能仲好)
係啲5-6千先 免強格硬  ...

已經有不少人好似C兄咁, 香港搵錢, 深圳居住. :victory:

日日B1 放工時候都頂閘. :lol

欠一百萬

kabon 發表於 23-7-2025 12:05
其本上而加收入少咗，生活成本越嚟越高，遲早入不敷支，會一直借都唔定
哈，講番你講果尐，我成世人黑到． ...

排公屋你無去做審查, 個申請就會取消左架啦.

40幾未到50, 就唔好單身排公屋啦, 個計分制係個個月變, 就係唔會比較年輕的單人上樓. 54,55歲開始先排啦. 呢個年齡之前都盡量搵錢, 過左額都唔怕. 到左申請時再執生, 搞掂個申請資格.

kabon

多謝大家回覆，或者簡單尐講一尐趣事：
１０幾年前岩岩份份倉，搬尐成８０磅既牛皮，有一日起身打咗個"乞痴＂，條腰就梗咗好痛，一個人請咗假撑住把傘當杖去伊利沙伯急症，
之後比人踼咗去乜診所等咗３個鐘，醫生話尐骨無裂，打止痛針，我問醫生可唔可以照磁力共振睇吓咩事，醫生即係
發癲咁怒喝：你哋尐人呀唔好成日諗住照呢樣照果樣！之後佢又話：我唔會寫４日病假比你呀乜乜物物，我同佢講：我剩係想止痛，你唔開病假都得啦．
其實止痛針根本止唔到痛，訓咗係床兩日打電話同公司講我休多日返工，點知下午公司打嚟話已經炒咗我，以後條腰就算好番都一直
隱隱作痛，訓咗係床兩日個人好灰，成世人第一次打比社工問下點，點知個社工八婆又係發癲型，我唔會寫紙比你上公屋㗎，我安排你去露宿者之家啦！
(吓?！我從來都無講過話要你安排住，只係想傾吓，又發癲??）
之後見好番尐轉咗做地盤測量蛇仔，經理好賞識我，入咗去做三個月就識哂尐嘢，有時坐寫字樓幫手入數，點知有日坐艇出海，爬上條柱躉度，
一撐起轉身一坐，條腰又中咗，最後算喇我辭咗工，條腰再嚟多幾次應該都好麻煩，最後轉咗去做門口狗．

我講咁多其實係想話香港已經唔同９７之前已經唔同哂，變既唔止係社會，仲有係人．

唔好再講同老破無關既嘢喇！之後破咗再嚟請教各師兄啦! 多謝哂!

失控的人

其實C兄你有保安牌可以搵份日更保安，做12個鐘有萬七萬八架，坐屋苑坐頭都舒服，悶就悶D，但准時出糧都幾好架

Reborn818

kabon 發表於 24-7-2025 00:20
多謝大家回覆，或者簡單尐講一尐趣事：
１０幾年前岩岩份份倉，搬尐成８０磅既牛皮，有一日起身打咗個"乞痴 ...

唔緊要㗎，你鍾意講乜都冇所謂，當傾吓偈。
條腰有舊患嘅話，你上網搵吓啲腰部復健拉筋動作，有恆心做吓會差好遠。
我咸豐年前炒過車，長期健身又打網球又羽毛球，又因工作關係成日坐喺度望住個電腦，腰骨都係有少少麻麻哋，所以而家基本上我都係晚晚拉下佢，係真係好好多。