找回密码
 註冊
查看: 6942|回复: 44

大專生破產增近兩倍半

[复制链接]
发表于 22-9-2009 08:43:13 | 显示全部楼层 |阅读模式
大專生破產增近兩倍半

.
學生資助辦事處○八/○九學年共錄得四百五十九宗大專生破產個案,人數較以往勁升近兩倍半,申請延期或拖欠還款個案,亦分別上升三成三及一成半,破產數字急升歸咎貸款後炒股失利,但亦揭出學生資助計劃二十年來無調整,資助不夠用惟有借利息較高的免入息審查貸款幫補,令負債如雪球般愈滾愈大,情況堪憂。

學資處五個大專生資助及貸款計劃中,過去數年學生破產個案徘徊在約一百宗,○七/○八學年有一百三十五宗,但○八/○九學年卻以倍數上升至四百五十九宗;申請延期還款的個案高達八千五百零四宗,較對上一年增加逾三成三;拖欠還款的帳戶數目,亦由一萬四千六百多個,激增至近一萬七千個,增幅逾一成半,還未計算拖欠還款帳戶的未到期本金,拖欠款額已達二億四千七百多萬元。學資處表示,去年正值金融海嘯,學生求職可能遇到問題,薪金亦較以往低,相信還款會有困難。

以小博大炒燶股
香港青年協會督導主任鄧良順說,曾有學生每年在學生貸款計劃借貸近十萬元,畢業後「孭債」數十萬元,不少人用貸款炒股票以小博大,去年至今股市波動,學生隨時血本無歸,加上平日信用卡欠款,最後索性申請破產避債。

壞帳情況惡化,學資處正檢討學生資助中的生活開支資助貸款金額計算方法,制訂更適切有效的機制及資助水平,現時的生活開支資助貸款上限,是以一九八八年學生開支為基礎,資助及貸款上限約為三萬六千元。教育界立法會議員張文光直言:「金融海嘯搞到經濟咁差,就算搵到嘢做,人工咁低點還錢?」他促請當局盡快完成學生資助計劃的檢討。

香港專上學生聯會秘書長周澄稱,生活開支貸款的資助水平是一九八八年訂定且過時,現時學生日常開支比二十年前多幾倍,她經常收到學生求助指資助及貸款額遠低於日常所需。學生及院校代表本月底將與學生資助辦事處開會,討論生活開支資助貸款的檢討進度。




窮學生孭20萬債唔知點還

【本報訊】「大學要讀四年,畢業已經有成二十萬債,依家已經好擔心將來點還錢。」浸會大學學生會會長葉楚茵與不少大學生有相同煩惱。她指一家五口只靠父親月入萬多元應付生活開支,但申請學生資助卻不批,只好借免入息貸款繳交學費,平日生活要「死慳死抵」,為畢業後的還款生涯感到擔憂。
不計支出成漏洞

就讀浸大社會科學及通識教育雙學位課程二年級的葉楚茵,原本以為可申請學生資助幫補交學費及生活開支,豈料兩年的申請都不獲資助,「學生資助辦事處只係計算家庭收入,無計埋一個家庭其實支出有幾多」,以她為例,她有兩個弟弟就讀中學,母親為家庭主婦,只靠父親一人工作照顧全家人,「你都知依家中學生書簿費幾貴,屋企根本好難儲錢供我讀大學」。


她的遭遇並非罕見,葉楚茵舉例指,身邊有同學的父親為的士司機,需把的士列作家庭資產之一,最終該同學亦申請不到學費資助,「架的士係搵食車,維修、牌費開支都好大,佢屋企實質上唔係富有」。

葉楚茵兩年來均在免入息貸款計劃下申請逾四萬元繳交學費,預計四年大學均要借貸,畢業時負債近二十萬元,幸好她是修讀教育學位,畢業後可做教師,能有穩定收入,「其他同學仲慘,畢業後唔知做咩工,得幾千蚊人工仲要還錢,真係好辛苦。」

[ 本帖最後由 301 於 2009-9-22 08:49 編輯 ]
发表于 22-9-2009 08:49:19 | 显示全部楼层
今朝我已經預備好文件寄去延期,
希望批啦,
唔想累咗我阿爸還:Q
发表于 22-9-2009 09:26:31 | 显示全部楼层
其實一個正常畢業生有無可能一出來社會做事就可以還到錢?

假設20萬貸款,分10年還,每年還2萬,即係每個月約還1800元.

又假設一個畢業生初初出來社會做事,有10000元收入,扣除搭車、食飯後,大約餘下5000-5500元.

再假設比3000元家用,咁餘下的錢剛好用來還學生貸款!

除非果一個畢業生平時可以著短褲、t-shirt、涼鞋返工,咁點都要有一定的服裝開支,及平時同d行家出來食飯吹水兼聯誼吓.咁10000元一個月的收入睇來又吾多夠洗.
发表于 22-9-2009 09:49:21 | 显示全部楼层
原帖由 gpo4074 於 2009-9-22 09:26 發表
其實一個正常畢業生有無可能一出來社會做事就可以還到錢?

假設20萬貸款,分10年還,每年還2萬,即係每個月約還1800元.

又假設一個畢業生初初出來社會做事,有10000元收入,扣除搭車、食飯後,大約餘下5000-5500元.

再假 ...


唔係分10年還,係分5年,
我記得extend極只可以改到7年。
車費飯錢家用置裝費,
樣樣都係錢:Q

其實以我所見為例,
我有舊同學父親係公務員搵1萬鬆啲,
一家4口住公屋,
細嗰個讀緊中學,
開支都唔少,
平時有2萬元儲蓄,
學資署就唔批啦!
3年apply,只有最後一年批5千loan俾佢,
有咩用?

佢好彩有親戚借,但欠落1X萬數。
依家佢出嚟做地勤,
底薪6k,開工足就OT都有1萬,
但依家時勢唔好每個月得8k,
你話佢剩係親戚數點還?

我又有舊同學因為阿嫲有棺材本成10萬,
但呢啲係老人家錢,
點都唔攞出嚟,
咁佢阿爸阿媽夾埋搵得1萬幾,
儲蓄都無,
迫住呢位同學借免息嗰隻,
一借就起息,
每個月份糧一出就無咗大部份,
佢話好彩搵到份著制服,慳返置裝費。

其實,如果係Grant & loan 唔係話還唔起,
但係免息嗰隻就真係借得多就唔掂。
发表于 22-9-2009 09:52:20 | 显示全部楼层
原帖由 margaretp 於 2009-9-22 09:49 發表


唔係分10年還,係分5年,
我記得extend極只可以改到7年。
車費飯錢家用置裝費,
樣樣都係錢:Q

其實以我所見為例,
我有舊同學父親係公務員搵1萬鬆啲,
一家4口住公屋,
細嗰個讀緊中學,
開支都唔少,
平時有2萬元儲蓄,
學資署就 ...


5年點可能還到20萬?

就算係5年還10萬蚊都好難頂!尤其是月薪1萬都吾夠的後生仔女!
发表于 22-9-2009 10:01:29 | 显示全部楼层
睇完都几擔心,因大女都有借免入息審查貸款兼讀碩士,真係驚第日要我去做洗碗幫佢還呀!
发表于 22-9-2009 10:05:53 | 显示全部楼层
你買定幾打菊X牌手套放係你個女間房,提醒佢一定要還錢.
发表于 22-9-2009 10:10:50 | 显示全部楼层
啱啱上去睇,
最長真係可以去到10年,
我嗰時最長係得7年。
但通常張還款form都係以5年計,
每次extend睇吓佢extend幾多期俾你,
唔會一嚟就分10年。
 楼主| 发表于 22-9-2009 11:14:52 | 显示全部楼层
呢樣真係:政府好心做壞事.

學生貸款真係千錯萬錯,
沙包揼自己腳.

:time:
发表于 22-9-2009 11:37:55 | 显示全部楼层
睇完呢的貼..哎呀.....希望佢快的嫁鬼咗算啦!
发表于 22-9-2009 11:40:11 | 显示全部楼层
原帖由 301 於 2009-9-22 11:14 發表
呢樣真係:政府好心做壞事.

學生貸款真係千錯萬錯,
沙包揼自己腳.

:time:


又唔可以咁講,
無呢個貸款,
你叫啲窮學生去邊度搵錢交學費!
學費分兩期交,
每期2萬幾,
前後半年交齊。
半年內搵4萬幾,
唔食唔著,全職打工囉。

學生貸款個問題係審批得好死板,
住埋一齊就當有份搵錢,
老人家棺材本計埋,
同學仔要勞煩老人家簽名話唔會攞筆錢供佢讀書,
講明筆錢係百年歸老用,
學資署死都唔批。

又除非屋企人係退休人士,
或者係窮到攞綜緩,
如果唔係都幾難批得高or全數,
剩餘下來的尾數,
唯有去免入息度借,
一借計息,息口雖然比銀行低但對學生嚟講係一大負擔,
我好記得有同學收到免入息的貸款確認書,
係喊咗出嚟,
佢話有錢讀書,出嚟無錢還又點算?

唔好睇大學公佈啲數據話大學生平均有幾多萬人工,
佢地個調查好tricky,
例如幾個choice俾你選擇,
below 8k, 8-12k, 12k-15k, 15k above,
我身邊好多大學生,唔係BBA或者醫科,平均9k,
咁個choice一定揀8-12k,
咁大學咪吹話今年畢業生人工有12k喎,
假象嚟啫,
仲要exclude咗話繼續study嗰班唔計,
可信度聽吓算啦。
好似我個programme,問大家最高嗰位係12k,
大部分人8k,邊得嚟公佈有10k呀!

而且依家個時勢,有8k都好好啦。

但同時間學資署算係好,
有得俾你延期,
Grant loan延2期左右,唔會計你息,
還開幾多還幾多,
只係時間延長,
延得長就當然重新計過啦~
免入息延期就點都計息,
但至少有得商量,
若然你欠數,
追數都好溫和。
发表于 22-9-2009 11:41:11 | 显示全部楼层
原帖由 lok196305 於 2009-9-22 11:37 發表
睇完呢的貼..哎呀.....希望佢快的嫁鬼咗算啦!


唔駛呀?
你個女好叻,
自食其力,
讀到碩士!
发表于 22-9-2009 11:57:20 | 显示全部楼层
原帖由 margaretp 於 2009-9-22 11:41 發表


唔駛呀?
你個女好叻,
自食其力,
讀到碩士!


佢超級鐘意讀書,本來係好事來,依家我無錢,佢要問政府借來讀,睇完以上文,我驚呀!佢男友求婚,佢都話要讀完博士先考慮,個男友話結咗婚去美國供佢繼續讀,依家佢可能考慮緊,我本唔捨得佢咁快嫁,依家唔好咁多意見啦.
发表于 22-9-2009 12:04:13 | 显示全部楼层
原帖由 lok196305 於 2009-9-22 11:57 發表


佢超級鐘意讀書,本來係好事來,依家我無錢,佢要問政府借來讀,睇完以上文,我驚呀!佢男友求婚,佢都話要讀完博士先考慮,個男友話結咗婚去美國供佢繼續讀,依家佢可能考慮緊,我本唔捨得佢咁快嫁,依家唔好咁多意見啦. ...


佢想出嚟做研究?
如果係去美國讀好!
香港好窄咋……

碩士,係咪8萬幾一年?
 楼主| 发表于 22-9-2009 12:04:40 | 显示全部楼层
其實香港失業率非常高,


政府用學貸冚住,


咪以為真係甘繁榮安定.


呢個學貸就係社會計時炸彈之一.




*無錢咪唔好讀 lor.{:2_28:}


[ 本帖最後由 301 於 2009-9-22 12:14 編輯 ]
发表于 22-9-2009 12:17:36 | 显示全部楼层
原帖由 margaretp 於 2009-9-22 12:04 發表


佢想出嚟做研究?
如果係去美國讀好!
香港好窄咋……

碩士,係咪8萬幾一年?


佢大學畢業,有個教授推薦佢留校工作,如果係番呢間讀有半價,但無佢想讀個科,去咗第2間讀要全費,佢知我無錢,自己搞掂,我都唔知几錢學費呀,
发表于 22-9-2009 12:40:00 | 显示全部楼层
原帖由 301 於 2009-9-22 12:04 發表
其實香港失業率非常高,


政府用學貸冚住,


咪以為真係甘繁榮安定.


呢個學貸就係社會計時炸彈之一.



*無錢咪唔好讀 lor.


當你考到中七,
見到有得讀,
屋企人都會支持。
而且大家都俾學資署甜美的貸款名稱胡亂咗,
以為讀到就有,
但原來最差條件先能夠批足,
Grant and loan10有89係冚唔足,
呢一刻都入咗學,
無人想放棄。

U入面都有啲助學金,
類似貸款形式,
但條件都好harsh,
例如彌償人唔可以係父母兄弟姐妹,
即係要拖其他人落水,仲要呢個人收入要有返咁上下,
證明第時佢有能力揹數。
其中手續要宣誓話屋企有困難,
彌償人都好似要宣誓話有咩事條數佢冚,
我當時見到咁,
即刻縮沙唔申請,
無謂煩到親人。
发表于 22-9-2009 12:41:34 | 显示全部楼层
原帖由 lok196305 於 2009-9-22 12:17 發表


佢大學畢業,有個教授推薦佢留校工作,如果係番呢間讀有半價,但無佢想讀個科,去咗第2間讀要全費,佢知我無錢,自己搞掂,我都唔知几錢學費呀,


話唔定你個女咁叻,
考到獎學金呢!

邊似我,
搞出個難攤子,
讀書做嘢無樣叻:loveliness:
发表于 22-9-2009 14:19:32 | 显示全部楼层
原帖由 margaretp 於 2009-9-22 12:41 發表


話唔定你個女咁叻,
考到獎學金呢!

邊似我,
搞出個難攤子,
讀書做嘢無樣叻:loveliness:

路係人行出來,正所謂馬死落地行,個女以前都好識嘆,邊諗到要佢俾學費.家用架,依家除咗番工.番學.其余時間都係補習攢錢,先知的錢咁難揾,咪會珍惜的囉!
发表于 22-9-2009 16:24:06 | 显示全部楼层
我本唔捨得佢咁快嫁,依家唔好咁多意見啦. ...


如果有好似四叔個仔咁既條件. 就吾好咁多意見啦. .

而且結左婚都可以繼續讀書...
您需要登录后才可以回帖 登录 | 註冊

本版积分规则

手机版|小黑屋|破產聯盟

free web stats

GMT+8, 13-11-2026 05:41 , Processed in 0.035232 second(s), 16 queries .

Powered by Discuz! X5.0

© 2001-2026 Discuz! Team.

快速回复 返回顶部 返回列表