破產署主任好挑機 資深朋友麻煩入一入嚟？

探險者

響電話度同我講話要啲文件，佢對會計師樓嗰條數好有質疑，所有嘢都唔相信我，我話我全部有單據，佢都係唔信，有好多日常開支等等都cut咗我都唔緊要，甚至我嘅飯錢都質疑點解唔搵啲平啲？大佬搵到先得㗎，所有地方都有兩餸飯咩？佢問我之前三年來有冇賣過物業？我話有，佢話要你賺咗幾多錢報上嚟，同埋點解會冇晒呢啲錢，佢話會唔會係你攞走晒啲錢之後爭人錢再破產，我當場呆咗響電話X咗佢，你係咪黐線㗎？如果我有呢個途徑我就係犯法啦，我等你嚟揭發我呀！當中我俾咗幾個原因佢，做生意俾人呃咗啲，賭博，買股票，佢要求我搵返啲三年嚟銀行嘅紀錄，以作為我嘅理據，大佬同銀行攞三年記錄唔係問題，問題係每一頁只要$50總數$1800，我可唔可以因為太貴嘅理由拒絕佢唔俾佢呢？仲要如果編咗出嚟，要炒晒三年嚟啲數俾佢睇究竟你俾人呃咗幾多錢？賭咗幾多錢？買股票？買咗幾多錢？大佬點搵啊？三年啊？！佢話俾一個月嘅時間我去搵呢啲資料，如果我俾唔到佢，其實係咪吹我唔脹？定係佢哋會有進一步嘅行動？我亦有冇途徑可以向破產處要求換破產主任？

天意玩弄人心

你賣樓然後要證明筆錢既去向，要求好合理呀

whysodump

師兄，好奇一問，破處主任批你幾多生活費？

探險者

天意玩弄人心 發表於 5-7-2024 00:25
你賣樓然後要證明筆錢既去向，要求好合理呀

起初都答佢話可以嘅，之後佢就係咁一輪嘴，我唔知你係咪賣咗層樓啲錢轉去其他地方，之後就周圍借錢再破產，咁我即時咪屌咗佢一句囉，黐X線！明知唔可以做嘅嘢走去做博拉咩？

探險者

whysodump 發表於 5-7-2024 00:27
師兄，好奇一問，破處主任批你幾多生活費？

報咗養阿媽冇細路一個人17,000幾 我平均月入23,000 預計大概上繳5000 呢個係佢計出嚟嘅初步未係最終結果

Yuyuyuu

天意玩弄人心 發表於 5-7-2024 00:25
你賣樓然後要證明筆錢既去向，要求好合理呀

我都覺得好合理，你比唔齊資金流向證明，叫人點信你

cftong

真係黐x線

法治社會，你懷疑我可以，你搵證據證明你懷疑係合理囉。點解破產者要不停搵證據證明佢嘅嘅口頭或內心懷疑？

差佬告殺人，都要有證據懷疑你殺人先可落案，有證據起訴你，然後你先再搵證據證明你清白。

cftong

好奇一問，你個主任係破署主任定外判？

Yuyuyuu

探險者 發表於 5-7-2024 01:00
起初都答佢話可以嘅，之後佢就係咁一輪嘴，我唔知你係咪賣咗層樓啲錢轉去其他地方，之後就周圍借錢再破產 ...

「明知唔可以做嘅嘢走去做博拉咩？」呢句說話都唔合邏輯，大把人明知會拉都去打劫啦。你賣樓講緊幾百萬，佢一定要你俾齊證明。你換邊個主任都一樣。

最後生還者

Yuyuyuu 發表於 5-7-2024 08:48
「明知唔可以做嘅嘢走去做博拉咩？」呢句說話都唔合邏輯，大把人明知會拉都去打劫啦。你賣樓講緊幾百萬， ...

打句問句，咁講已經證明樓主身有屎

Yuyuyuu

cftong 發表於 5-7-2024 08:44
真係黐x線

法治社會，你懷疑我可以，你搵證據證明你懷疑係合理囉。點解破產者要不停搵證據證明佢嘅嘅口頭 ...

賣樓完轉走咗幾百萬，要俾statement證明筆錢真係輸咗蝕咗，而唔係轉移資產，咁都唔合理？如果係咁個個立即賣樓再間接轉晒俾家人，然後一句解釋蝕晒就搞掂啦。法例就係寫明有權要求你提供合理證明，你唔提供仲想學人講法治？

樓主而家係連statement都嫌貴唔想俾，叫主任點信。

square3207

你賣樓既錢幾百個。一定要你解釋啦。你做生意一定有資料架 做咩生意咩公司資料等等。無可能就咁比筆錢人做架？無論外判好定主任都一定講證據。無可能你話係就係架啵。你盡自己辦法比到幾多資料咪比幾多囉。唔係一句話貴難搵就唔理。你自己既事人地幫唔到你幾多。

cftong

諗真啲，其實大家都講得啱，破產都係一種學習，要自我檢討，繼續提醒自己要做好準備。
好似樓主呢個case咁，如果一早爬咗文，就留定晒紀錄，唔使嘥錢去攞statement。

探險者

其實上面都講中咗我個point我本身就係唔會咁樣做，所以先會咁樣問，如果我會咁樣做就唔咁樣問啦，同埋我想講買層樓幾百萬啫，但係唔會賺幾百萬㗎，所以我就係想問，如果我唔攞呢啲文件俾佢睇，佢咬唔咬得我入？ 同埋個前設係破產者都冇錢又點可能用千幾兩千蚊去同銀行攞呢啲文件呢？呢個係我單檔嘅位，我話做生意俾人呃，佢問我有冇報警，我都同佢講我連自己都冇證據點會行入去差館呀？差佬都唔受啦．佢話如果你冇報警，咁即係你隱瞞詐騙，佢都黐線，佢係正常破產主任唔係外判，因為佢個電話打電話話係破產處聽

探險者

所有嘢都係佢嘅質疑懷疑，但係如果最後會唔會影響到我嘅結果？我想問，因為都係佢自己諗咋嘛，其實佢唔會影響到我啲咩㗎？我都係等生活費出咗四年之後又係一條好漢，咁我需唔需要做呢啲證明啫？我意思係

airmax

似乎係話你詐騙

Anmi2019

探險者 發表於 5-7-2024 12:55
所有嘢都係佢嘅質疑懷疑，但係如果最後會唔會影響到我嘅結果？我想問，因為都係佢自己諗咋嘛，其實佢唔會影 ...

主任都要交功課，你無証明畀佢，佢又點寫噃份報告畀各債主？是但1個債主唔滿意/接受，佢都有權向法庭申請要求延長你個破產期，第一次申破最長可延多4年㗎。
你用張白紙寫張書面聲明，先寫清楚自己個人資料(你個名同破產案檔編號)，之後就逐點寫清楚。
1. 大約幾時畀咗幾多錢出嚟，同咩人喺邊度做咩類型生意，幾時點樣發覺被人呃咗。
2. 賭嘅，經馬會就去馬會拎記錄，賭外圍就照寫賭外圍玩咩，大約由幾時至幾時開始玩，前後一共輸咗大約幾多錢。
3. 幾時開始買咗邊隻股幾多股，幾時開始蝕錢 都有記錄呀。
4. 餘下幾多錢做咗你幾時至幾時嘅生活費。

總之夾噃哂賣咗樓賺到嘅錢同欠信用卡/財仔條數，就ok啦。

銀行交易記錄有哂銀碼同轉賬時間，咪方便你寫噃出嚟囉，除非你現兜兜畀錢人啫。畀錢去銀行拎噃啦，拎完最多同主任講下期上繳可唔可以扣噃數囉。

a981142

探險者 發表於 5-7-2024 01:00
起初都答佢話可以嘅，之後佢就係咁一輪嘴，我唔知你係咪賣咗層樓啲錢轉去其他地方，之後就周圍借錢再破產 ...

咁真係好多人呃破產,要求拎文件證件明你唔係都好合理

a981142

cftong 發表於 5-7-2024 08:44
真係黐x線

法治社會，你懷疑我可以，你搵證據證明你懷疑係合理囉。點解破產者要不停搵證據證明佢嘅嘅口頭 ...

你先黐x線,而家係你還唔起,你申請破產
由你提供資料完全合理,除非你驚人揭發囉

a981142

探險者 發表於 5-7-2024 12:53
其實上面都講中咗我個point我本身就係唔會咁樣做，所以先會咁樣問，如果我會咁樣做就唔咁樣問啦，同埋我想 ...

理你賺定蝕,總之你有幾百萬嘛
你而家話無哂錢仲欠債要破產喎,拎證明好合理