取消破產呈請

Reborn818

Pigpig567 發表於 1-7-2025 13:39
因小額而比律師申請，但已找數到小额。

我嘗試吓組織晒成個故事。
小額錢債判你敗訴，但你一直冇找數，於是債權人搵律師申請你破產，而家你已經喺小額度找齊數，想問點樣撤銷被申請既呈請？
首先，係佢＂話＂會去申請你破產？定已經收到法庭傳票？

Pigpig567

系呀！收到破署，跟著聆訊第一庭前已找數。

Pigpig567

現在都系押後下次上庭

Reborn818

Pigpig567 發表於 1-7-2025 16:16
現在都系押後下次上庭

咁如果你被破產，只係牽涉一個債權人，而家已經找齊數，當然最理想就係債權人同法庭自動撤銷，如果佢冇處理，你帶齊所有找數嘅證據，係下一庭同法官講，正常佢都會同你撤銷，唔會判你破產。

Pigpig567

我就係吾知出左咩問題？冇呀！個法官仲要押後，煩死。最慘個官又吾講清楚，淨係叫我問法律意見，問律師都話吾知，D律師都話吾會咁。所以求咁多位師兄教教小弟，最慘D户口凍晒咩都做唔到。現在出面環境吾好，真系做鬼都吾靈咁先慘。????

Reborn818

Pigpig567 發表於 1-7-2025 17:20
我就係吾知出左咩問題？冇呀！個法官仲要押後，煩死。最慘個官又吾講清楚，淨係叫我問法律意見，問律師都話 ...

已經行到法庭程序，而家無其他辦法搞了。第一庭嗰陣時好大機會高院文件未齊，或你債權人未覆，你已經肯定全部償還債項等等，正常下一堂應該搞掂的。

bankruptcy01

呢個論壇同埋呢篇帖文＋「取消破產呈請（2）」都真係幫咗我好多，所以我都特登花咗啲時間分享返我嘅經歷比以後見到呢個po嘅師兄睇。大家成功取消到破產，希望大家未來都可以生生性性，重新做人！如果係因為賭到破產嘅話，積極建議大家搵返平和基金資助嗰4間戒賭機構去接受輔導，認真處理吓自己問題嘅根源。希望我嘅分享幫到大家！～

〖聆訊日一星期前〗
1）填寫誓章，誓章可以經由以下途徑取得：
i）到高等法院無律師代表訴訟人資源中心（地址：香港金鐘道38號高等法院大樓低層一樓 LG 105室）度索取
ii）上網自己下載同列印（可以Google search：「HC-誓章 (高院民事訴訟 / 雜項 / 破產案件)」搵到）

我自己當時就係喺去無律師代表訴訟人資源中心度拎表格嚟填的。去counter同嗰呀姐講你想取消破產呈請，佢會叫你講你嘅聆訊編號，佢就會遞張誓章表格比你同埋簡單教你幾句應該點樣填。我都建議去嗰度直接填，主要因為有人教吓你，唔駛驚填錯。宣誓內容我剩係寫咗1-2句，簡單講我已經籌到錢償還我嘅欠款咁樣。建議大家份文件啲窿窿唔識填嘅就空咗佢先，一陣解釋點解。

註：留意其實LG2都有個無律師代表訴訟人嘅centre, 不過嗰個係for法律意見諮詢，唔好去錯。我嗰日就比門口保安點咗我去LG2嗰邊，排隊等咗差不多半個鐘，最後先同我講唔係被人告破產嗰啲唔係佢地服務範圍。

填完份誓章之後你就可以拎住份嘢去LG340度排隊做宣誓。我嗰陣人好少，前面大概等1-2個左右，差不多5-10分鐘左右就輪到我（因為前面條友份誓章應該好多問題所以比入面嗰呀嬸係咁執佢）。啱先提到誓章唔識嘅窿窿唔好填住嘅原因係，入去誓章房嘅時候嗰寸77嘅呀嬸都會幫你對多次份嘢有冇填錯先，嗰陣我有啲位填錯咗比佢西我面＋吊咗我幾句。所以份誓章有啲位唔識填寧願空咗佢先，入去先問吓佢啲位應該點填。份誓章OK冇問題之後喺個呀嬸面前宣誓就搞掂。

宣完誓之後行前兩步入去另一間房（LG342）度交文件存檔。咁樣就搞掂晒上庭前取消破產呈請嘅程序。

事關我嗰陣申請破產係搵三姓，所以假如你自己本身係有搵律師行同你做破產，記得你都要通知返佢地你打算取消破產呈請。三姓嗰陣呃9我話取消破產呈請整嗰啲文件要寫返原因解釋同複雜，所以如果由佢地代辦我取消破產呈請嘅話要收我$30,000。我嗰陣覺得好Q肉赤所以喺破產論壇度爬咗一大輪文，見到呢個post TomC123師兄同埋Reborn818師兄教話好簡單所以最後都係決定自己做取消破產呈請。咁我嗰陣通知返律師行之後，佢同我約咗個日子上返去律師行度填返啲文件確認我取消搵佢地繼續代表我上庭。正路嘅律師行應該都會幫你寄返封信通知高院你會自己做返取消呈請。跟據呢個post唔記得邊個師兄提到，如果仲有律師代表緊你的話，你應該係冇得自己代表返自己上庭的（頭盔，呢點我唔sure）

〖聆訊日〗
我聆訊時間係0930。但唔知係嗰官偷懶定係正常做法都係咁，我嗰日最後係連埋10:00同10:30嘅人一齊上庭。我本身仲要早咗15分鐘到，最後由09:15等到11:19先可以正式上庭。當日你去到指定嘅樓層之後，其實啲保安呀姐都會叫你去court隔嚟有間玻璃房仔度排隊簽到先。入到去嗰個簽到嘅呀姐會再問多你一次你係咪打算申請破產，我嗰陣同佢講返我想取消破產呈請，跟住佢會幫手remark返。然後坐到2046等人嗌上庭就OK了。事關最後group埋咗3個time slot嘅人，所以最後都有差不多50-80人左右一齊入去，基本上個court所有有櫈嘅位置都會坐滿晒人。

＊因為爆咗字數，所以下面待續

bankruptcy01

〖上庭〗
我嗰官嗰陣係揀咗啲文件有問題嘅人逐個嗌名出嚟處理咗先。第二批處理嘅就係取消破產呈請嘅人，而正常破產程序嗰堆人就最後先處理。所以上到庭後最後大概等咗20分鐘左右先輪到我。到你嗰陣，法庭書記會逐個嗌名，聽到名就企起身嗌到，跟住行出去個官前面一字排開企喺度。嗰官大概會問你有冇通知過破產管理署署長，如果冇嘅話就會批個暫准乜乜令，簡單嚟講就係如果破產管理署有額外收費要追收你的話，佢可以係7定係14日內向法庭追討返嚟，然後喺你嗰$9,000幾蚊嘅破產訟費度扣返。而正常情況應該剩係會扣返你$4,100（定係安排派返$4,100）比你咁樣。至於有部份人可能會擔心嗰官會唔會問長問短／問你原因，想講我嗰庭個官唔知係因為太多人啦，所以basically全部都係走程序咁走，完全冇問過原因，總之你想取消破產呈請就取消咁嘅款。最後佢就會宣佈正式批准取消破產呈請，然後問埋你有冇問題想問，冇問題嘅話你就可以閃水。跟住你取消破產呈請嘅程序就正式完成！！～恭喜恭喜！！

4個字總結成個取消呈請嘅過程＝簡單到嘔！所以建議以後打算取消呈請嘅師兄可以積極考慮自己處理，唔駛蝕幾皮嘢比啲律師行賺，因為真係簡單到一個點。

另外我自己都有問過破產管理署，佢地表示就算取消咗破產呈請，其實將來查冊都會有相關遞交破產申請嘅紀錄，而呢個紀錄係永久，無法撤銷。而環聯方面我都有打去了解過，嗰紀錄（取消破產呈請）好似都係會keep 7年左右。所以其實由你一遞紙申請破產嗰吓，你已經要預咗你嘅TU嚟緊十年八載都會爛晒。

bankruptcy01

以下係我之前整理咗唔同師兄（主要係TomC123同Reborn818師兄）嘅分享內容，整理咗方便大家睇。

【撤銷破產呈請程序】
1）（上庭一星期前）
重新做咗份誓章。要去高等法院重新寫過一封嘢／做咗份文件話撤銷呢個申請，書面通知法院。入紙話要取消個呈請
2）去宣誓
3）交表格
4）去存檔
5）（上庭當日排隊登記時）
入court前要登記資料，同職員／書記講要撤銷破產呈請。如果佢問係咪有律師代表，可以話佢哋幫我搞呈請，但我想撤銷佢要收我xxxx，我已無力支付，所以自己搞。你想取消呢個申請。正常情況底下佢就會mark 低你資料
6）（上庭時）
每個官有每個官唔同嘅做法啦。今日呢個官呢佢就趕走咗啲要改資料嘅人先，之後就讀一啲資料/文件冇問題嘅人就問佢哋係咪真係要做呢個呈情（意思即係當刻佢問你，你都仲可以揀做定做）
咁之後呢佢就會做一啲提前講咗撤銷呈請嘅人。法官就會問清楚你是否撤銷＋問你原因，話有家人幫我就得。跟住佢講返嗰啲堂費點樣樣退跟住就走得喇。佢亦都冇特別問題要問  <-- 如果你冇之前未搞，法官宣佈撤銷後，法庭書記會教你所有程序（會有張指引俾你跟住做），教你點做＆填form＋俾張紙指示你去宣誓同存檔。

〖上庭當日衣着〗
只要唔係短褲背心（有啲法官會出聲話你），乾淨整齊就可以了。

〖法庭之後有無話會出噃張撤銷令/任何証明畀你〗
有，要2-3星期左右喎，而且中間亦都冇所謂臨時文件。

〖銀行戶口解封〗
- 正式撤銷呈請後，破處會通知金融管理局，一般五至七個工作天就會所有銀行戶口解返凍。
- 要等法官正式判決咗，宣布你撤銷呈請先可以做嘢。上庭後再加多兩至三個禮拜應該就最穩陣
- 寄俾我啦。不過亦都有人同我講：可以今日打後一兩日或者兩三日試吓去銀行問一問。所以最壞嘅情況都係等囉。 <-- 銀行個邊正常應該好快搞掂

〖唔批准你呢個撤銷嘅申請？〗
- 點會唔批准？正式頒令前你都有權撤銷呈請。

〖自己搞／搵律師代辦〗
- 如果律師要另收費自己去搞啦，其實好簡單。律師想收錢當然又話點點點
- 如果唔想俾錢律師樓賺（根本冇需要仲要收咁貴），自己去搞。
- 自己去順順利利撤銷呈請，咪益D PK。（雖然我明白嗰啲PK，講到好似冇咗佢哋搞唔到咁，一般人都費事煩俾錢算）
- 唔係一定要俾錢佢哋賺的，根本簡單到嘔。

〖其他〗
- 我冇記錯，如果你係有律師代表你自己再上庭好似都唔會有人理你。同律師樓講頒令當日暫緩唔使佢代表就得。
- 印象中堂費應該退一半，定好似4千幾
- 破產管理署嗰邊就真係真係冇用嘅。任何嘢都話唔知唔係佢決定幫唔到乜都冇。

〖資源〗
無律師代表訴訟人資源中心
電話：2825 0586

〖我之前問過嘅問題，而家自己自問自答返〗
1. 我見到三姓律師行官網寫如果取消呈請的話要登報通知債權人，係咪真㗎？
A：我最後完全冇登過報都成功取消到。不過本身你想取消呈請其實suppose都會聯絡返債權人通知佢地。

2. 其實如果取消咗破產呈請之後，破署嗰邊仲會唔會留有紀錄？
A：會有申請過嘅紀錄，留一世的。

3. 想請問一下誓章係咪就係用返高等法院「HC-誓章（高院民事訴訟／雜項／破產案件）嗰一份？
A：yes

4. 誓章嘅內容其實應該寫啲咩？係咪簡單寫返自己希望徹銷破產呈請同埋有關原因就OK？有冇需要交相關文件證明？
A：yes。無需要遞交相關文件證明，剩係交份宣誓就OK。

5. 宣誓駛唔駛約期？係應該去邊度進行宣誓？
A：宣誓唔駛擇日，你喺佢辦公時間內搵日過去就OK。宣誓係去高院LG340。

6. 我見到有師兄話宣誓後要交表格／文件，想請問除咗誓章之外仲有冇其他文件／表格需要遞交？
A：除誓章以外冇其他文件／表格需要遞交。

7. 存檔係咪親身去返高等法院度交就OK？我見有師兄表示要fax去高等法院。
A：親身遞交就OK，fax唔清楚。

8. 我有冇需要將有關文件嘅副件fax／寄埋比我債權人通知佢地？
A：冇需要，我當時係直接通知返我嘅債權人only

Reborn818

恭喜師兄賀喜師兄，Yeah，太好了，終於搞掂取消破產呈請。
好勁好有心機，將整個過程有邏輯有重點地處理，將來有同學仔有需要一定對佢哋幫助好大。
但我到而家都係覺得匪夷所思，三姓竟然開價三雞，佢老味，真係CSL。

bankruptcy01

多謝reborn師兄你就真，你嘅分享都真係幫咗我好多（同埋慳咗三皮嘢:lol:victory:）!!:P

bankruptcy01

不過想問吓各位師兄我幾時可以去開返銀行戶口？因為法庭批准我申請之後都冇寄返任何文件比我，好似咩都冇發生過咁:dizzy:

補充內容 (16-7-2025 11:13):
同埋法庭批准咗取消破產呈請之後其實我仲有冇其他事項需要跟進處理㗎？

Reborn818

bankruptcy01 發表於 16-7-2025 10:48
不過想問吓各位師兄我幾時可以去開返銀行戶口？因為法庭批准我申請之後都冇寄返任何文件比我，好似咩都冇發 ...

法庭文件好似要幾個禮拜先會寄俾你？
或者打去法院無律師代表訴訟人資源中心問問？
其實大銀行正常一般已經好快有記錄的，睇吓Tom師兄會唔會上黎，等佢答你就最穩陣

TomC123

bankruptcy01 發表於 16-7-2025 10:48
不過想問吓各位師兄我幾時可以去開返銀行戶口？因為法庭批准我申請之後都冇寄返任何文件比我，好似咩都冇發 ...

開返銀行嘅話
就點都要等法庭或者破產管理處寄返嗰份文件俾你
咁當你收到嘅時候
你去銀行俾返呢份文件同埋講返你個情況咁就OK
一切都係等嗰份文件為準

bankruptcy01

Tom師兄你嗰陣大概等咗幾耐先收到法庭／破產管理產嘅文件？

bankruptcy01

同各位師兄分享吓我收到法庭寄嚟嘅信了～
信件寄出日期係聆訊日嘅2日之後
所以基本上其實1個禮拜（頂盡2個禮拜內）都一定收到的了～
呢個fourm都幫咗我好多，所以我都影咗啲相比以後上嚟睇嘅師兄可以參考吓

而銀行開戶口方面，我大概由聆訊日開始計大約等咗2個禮拜先去咗新嘅銀行（1間實體＋1間虛擬銀行）開戶口
2間都成功開戶，可以正常過數同收其他人嘅FPS

信用卡方面因為家陣TU都跌到落去I級
所以試過申請2張財務公司嘅cheap雞信用卡都被reject咗
所以斷估應該都冇咁快可以開得返信用卡嚟洗靚返自己TU評分

希望我嘅分享都幫到以後上嚟呢個論壇想申請取消破產呈請嘅師兄啦～

Reborn818

bankruptcy01 發表於 24-7-2025 11:37
同各位師兄分享吓我收到法庭寄嚟嘅信了～
信件寄出日期係聆訊日嘅2日之後
所以基本上其實1個禮拜（頂盡2個 ...

恭喜師兄，終於搞掂晒。
TU 慢慢搞返上去，小問題嚟嘅

腳踏實地

恭喜01兄順行取消呈請，
個流程攻略好生動又清晰，
多謝你寫出嚟畀大家學嘢。

bankruptcy01

Sorry又推返嗰post上嚟，今次應該會係最後一次update～

因為我前排終於收到破產管理署寄返比我嘅$3,900支票（計返收到信嘅日期係聆訊日後第22日）

不過其實佢寄之前有打過嚟比我，問我想上佢地中心自取，定抑或寄比我（免運費），而我揀咗後者咁。

都up埋最後幾張相for大家reference，希望我嘅分享幫到以後同我有相似經歷嘅師兄:handshake

祝願大家生活平安、一切順利:victory:

信件正面


信封背面


信件內容


$3,900退回破產呈請按金餘額嘅支票

Anmi2019

bankruptcy01 發表於 5-8-2025 16:19
Sorry又推返嗰post上嚟，今次應該會係最後一次update～

因為我前排終於收到破產管理署寄返比我嘅$3,900支 ...

{:4_186:}{:4_177:}