一直都係家庭主婦，破產後一年被逼要搵工

cftong

life_hopefuture 發表於 23-8-2024 20:26
多謝你幫我鬧佢啊！好解氣啊！之前未來這個論壇前日日想起封信食唔安，訓唔落，幾乎抑鬱！好彩收到大家既 ...

樓主，依家你有件事一定要做。就係覆佢「好，我會採納你哋嘅建議嘗試搵工。」，佢而家就係博你 say no，四年後又會搵藉口屈你一嚿錢，如果唔比錢就會申請延長你嘅破產令。

你要製造咗個證據保護自己，你回覆咗「願意搵工」。但願意搵工唔代表一定搵到。正如好多師兄所講，話搵就搵到咁冇人失業啦。到時如果佢真係申請延長你破產令，上庭嘅話你就有證據保護自己，因為你講過「我願意」。

串啲嘅話，寫封信去佢公司話申請做個你以前嘅職位，開價你以前份人工，睇佢肯唔肯開個位請你。如果佢唔請，上到庭又多份證據「貴公司都唔請我，點解認為人哋一定會請我？」。到時佢任何唔請你嘅理由，都可以成為其他公司唔請你嘅理由。上到庭你就冇得輸。

life_hopefuture

我想請問點解我say no 後佢會有機會四年後屈我比一舊錢？同埋我以屋企有未成年子女要照顧唔可以係一個合法理由嗎？無理由我出去做野無人湊細小朋友wor，何況我細那個先10歲。

加上巨一間公司咁多員工，明明A同我話我做家庭主婦合法，跟住B又話唔得，咁即係點呢。。。
跟住下年交年報又搵C 黎跟進，佢又發作既話，咁4年後未好難畢到業？

tony浸信會

其實你唔明嘅意見    就唔好理會啦！   其實你寫了許多    竟然一句老公嘅現况   同佢有何方法     都避而不談      純粹睇你現況     畢唔到業已令大家都不覺得奇怪      反而繼續留意公屋有沒有進展    比畢業更加重要吧！

bjerrykmc

life_hopefuture 發表於 24-8-2024 16:03
我想請問點解我say no 後佢會有機會四年後屈我比一舊錢？同埋我以屋企有未成年子女要照顧唔可以係一個合法 ...

某程度上佢哋無得迫你「搵到工」，無論你經濟環境點都好，外判係無得迫！
但係，想件事大家好過啲你可以話「我會試下搵工」俾條梯大家都得退1步，大家都易交代！

外判，佢哋都要同債權人交代你有「試過」搵，但係搵唔到！

cftong

life_hopefuture 發表於 24-8-2024 16:03
我想請問點解我say no 後佢會有機會四年後屈我比一舊錢？同埋我以屋企有未成年子女要照顧唔可以係一個合法 ...

樓主，你仲未明晒成個遊戲嘅玩法。
破產唔係講道理，更加唔係講人情，係講對策。
唔好再諗佢間公司點做嘢、流程，外判為咗屈你錢，咩都做得出。亦都唔好想像到外判間公司有幾有規模、幾有規矩。邊個負責，佢鍾意點就點。
你最後嘅保護罩，只係法律。（雖然都未必百分百保障到）

cftong

life_hopefuture 發表於 24-8-2024 16:03
我想請問點解我say no 後佢會有機會四年後屈我比一舊錢？同埋我以屋企有未成年子女要照顧唔可以係一個合法 ...

真心為你好，千祈唔好say no.

我以一個爬文爬得多嘅新手話俾你知以下案例：

有師兄俾外判屈，要佢個老婆出嚟做嘢，情況同你一模一樣，外判竟然話「你請個工人照顧小朋友，然後個老婆出嚟返工」。聲稱咁樣可以增加家庭收入。

其實佢俾個咁嘅建議，原因得一個。就係想令嗰位師兄嘅開支除一半，然後外判又可以cap水。因為個工人嘅開支，外判可以批少啲甚至唔批（上到庭，這不是必要開支）。但老婆有收入，攤分家庭開支就好合理。生活費就可以減半。

記住，我知你心裏面覺得自己合情合理合法，但記住外判信唔過，佢既然佢有心玩你，要揸乾揸盡，仲恐嚇你，你就要準備定上庭嘅口供。你今日say no，佢就贏一半。
因為大把人都要搵食冇得照顧小朋友，交俾家人朋友甚至社福機構照顧。個官大把理由否定你。