咳咳,收到大人叫我寫低綜援下工傷事項,點樣由全數上繳拗返全數落袋,嗰日心情真係好似坐過山車一樣。一朝早,社署個人打嚟話之前計算薪金到唔係用平時入息計法,要全數上繳,佢開頭講到一舊舊又話咩一半,問多兩問,佢同我講要扣晒全數俾社署。聽完我即時醒晒,大拿拿$8300幾架。粗口都爆咗兩句。
當我收咗線之後,開始覺得好唔合理。我頭先已經不停咁同負責我個case的果位小姐,不停咁爆粗同係咁重複住一句ridiculous,「點解我工傷你地綜援唔係可憐我,竟然仲要拎埋我D錢走,有冇咁的可能,你叫咩綜援,你都唔係幫我,簡直係好mean,mean到係乞衣(斗)到拿飯食囉!叫咩綜合社會援助,簡直係明搶」發完癲後,我就冷靜落嚟,當然根據我多年對抗社署經驗,都係打電話去23432255,搵社工。點知個社工答得我仲好笑 「點解我工傷拎到的法例薪金,你地綜援要全數攞走,一半都唔留俾我?有冇可能咁荒謬?」 「我諗攞走你的原因係因為你唔係用勞力賺返嚟」 「下,我唔返工就唔會工傷,唔工傷我就唔使放病假,你地呢啲咩理論嚟架?有冇咁荒謬的事?勞工法例要出糧,你地綜援就唔俾人攞走舊錢,咩叫唔係用勞力賺取,勞工處同社會福利署都係屬於勞工及福利局,我係咪要問下張建宗呢D咩條例同規距嚟架?咁勞工法例唔保障領取綜援人仕咁不如你立法嗰陣索性講明綜援受助人不受勞工法例保障啦!左手交右手,完全係荒天下之大謬,以子之矛,刺子之盾,咁多餘的?」 「小姐,詳情我真係唔清楚,如果你對呢個決定不滿可以上訴」 「上咩訴?你地上訴有咩用?宜家擺明係你地個policy有問題,我上唔上訴同你個policy唔會有關架喎」 「咁我一係俾社會保障部個電話你,你打去提出你的問題啦,電話係‧.........」 於是,我就打電話去佢個部門,我第一句就問呢到係咪社署,我要問下點解工傷期間勞工法例規定的4/5人工要全數攞走? 「我搵有關同事解答你」 「社署呀嘛?」 「係」 「我想問,點解我工傷期間僱主出俾我的法定薪金要全數上繳?你勞工法例出俾我的薪金嚟架喎,點解唔係好似之前咁當平時入息咁計?要我全數攞返晒出嚟?我工傷返唔到工,點解你地唔係同情同可憐我,反而仲要我拎返全數出嚟?宜家你地係咪覺得你地一個月嗰五千幾蚊係夠用先?夠用我就唔使咁辛苦仲要返兼職搵錢買藥啦。你地以為醫療豁免大晒,唔使醫療費?我食嗰啲藥個份量根本藥物名冊就冇,我每個月買藥錢都成六百蚊,係咪你額外俾我先?你地呢D咩policy嚟架?勞工處話要出,你地社署轉頭又拎走,有冇咁ridiculous呀?左手交右手?我玩得你個遊戲我就接受個rule,但你宜家拎我全數我點都接受唔到囉!呢D係咩條例先?你地叫咩綜合社會保障援助姐,我完全唔覺得你地援助我喎,反而仲嚮到搶我錢。好老實講,果筆錢如果係因為我工傷僱主俾我的薪金補償,如果係咁睇,筆錢應該係全數歸我asset,同你地冇關喎,我唔過你資產限額,你應該要俾埋個全數我,係你俾我唔係我俾你喎!」 「我要查一查先可以覆到你,或者我點今日都覆返你」 「我晏晝要去見一見醫生,你不如聽朝先打俾我啦」 「好,我姓陳的」
我邊有咁順攤,呢D咁荒謬的野,當然要搵下傳媒啦。本來想打俾肥佬黎,但冇電話。結果最後係打咗俾方向。其實登記咗等佢覆返我,個記者晏晝五點到就打咗俾我了解完即約我後日做訪問。 睇完可能你地會覺得點解咁大膽?原因好簡單,因為唔係佢死就係我亡,大佬大拿拿8300呀,最多都係分24個月還,我點還呀,自己身體又唔同正常人,唔可以正常咁日日返工,更何況我都冇得輸,爛命一條,咁先好玩架嘛。而且,呢D咁唔會理的野當然要出下聲,嘈下佢啦,唔反擊我完全對唔住我自己同埋個荷包.......死就死啦!
到第二日,嗰位陳生當然冇可能真係咁好會覆我,我等到十一點幾就打去問佢(仲唔打,食飯喇) 佢係咁同我講的 「我今朝了解過件事,因為嗰啲係你工傷期間出的津貼所以要全數攞走!因為辦事處個主任昨日同今朝都放假,要晏晝先返,我叫佢返嚟打返電話俾你啦」 「其實我同方向日報報咗有關事件,仲約咗我聽日做訪問。我真係覺得你地咁講好唔合理囉,你地社會保障條例唔係要援助市民咩,宜家真係明搶。我昨日同記者講,佢聽完都覺得好唔合理。勞工法例原來保障唔到綜援受助人的」 佢可能聽到有可能傳媒報導,所以變得積極咗。 我:「我只係知道你地綜援會拎走收入的只會係可預期收入,包括培訓津貼、僱員的飯錢津貼,呢啲津貼,但我真係唔知點解工傷的薪金要全數拎走喎?工傷期間的4/5薪金係因為根據僱員補償條例第232條工傷下的指引去出返因僱員在工作期間受傷而返唔到工所得到薪金補償,英文個term係叫做periodical payment,呢個係仲有一個min base去計算佢工傷期間應得的4/5薪金以得到一個保障,法例規定最少要為3690。(3690/30*4/5*工傷病假日數) ;如果因為僱傭條例第57條入面的418,因放咗超過連續四日而得到的4/5薪金為病假津貼,就真係叫做sickness allowance,兩個唔同nature喎。我工傷放一日,僱主都要出糧俾我,唔使等連續四日。我真係覺得工傷期間得到的薪金,真係薪金嚟,仲要係因為你因工受傷返唔到工僱主俾你的薪金補償,嗰筆錢直情就係我資產啦!咁嗰到得嗰8000幾蚊我資產限額有43500一D都唔過,所以其實應該係你俾返錢我,唔係我俾返錢你喎!」 陳:「(無言)」 我:「或者咁講啦,我問你,如果你宜家嚮社署整親,勞工處裁定咗係工傷,放咗一個月工傷病假,呢一個月社署根據勞工法例,出咗30日4/5的糧俾你,呢個係你的薪金定係津貼呢?」 陳:「分區主任放完假返嚟就會打俾你架喇,你等下啦」 到咗成兩點半電話都冇個,我又打去灣仔追。 「我想問係咪今日會覆返我呢?因為方向日報嗰邊唔拖得幾耐(我作佢打過俾我)佢已經追我係咪聽日可以做訪問」 「我都同同事講返件事,佢睇完晒D文件會打返俾你架喇」 收線後我打咗去分區搵主任,但係冇人聽。唯有打去分區接待處問個主任係咪返咗工啦。好辛苦先搵到佢。佢第一句就話我份人工一時又千幾蚊一時又幾百蚊,又話我拎緊高額傷殘仲咁辛苦出去做嘢。(千祈咪以為佢好人,因為佢係想chok我同告我唔返得工)仲問我醫生知唔知我返工。 「我係需要人照顧,你都見到我份糧一時千幾一時又幾百,我冇病冇痛嗰陣咪返多D人工咪多D,唔舒服咪唔返,咪搞到得幾百蚊囉。宜家身體差到就快要同你地申請筆錢買電動輪椅。醫生都鼓勵我返下工,因為心情會好D。」 「咁你返咩工架?」 「馬會兼職,收錢嗰種。一返去就坐嚮到收錢。點解我工傷的病假錢要全數上嬓呢?我都冇418,唔係allowance嚟」 「其實係咁的,工傷錢判傷後的賠償會扣減返你病假的薪金」 「我冇判傷喎,而且我覺得舊錢係compensation,即其實係assets嚟架喎」
主任:「係你講得無錯嗰筆係賠償,當你判咗傷之後,你得到的嗰筆錢會扣減返你嚮工傷期間得到的薪金,所以係你的資產。」我:「係囉。但我冇判到傷喎,而且你都識講係我資產啦,嗰到加埋得嗰八千幾蚊,我幾時過你地個資產限額,你憑咩拎走我嗰八千幾蚊?馬會都係用3690做base去計*4/5*我病假日子喎」 主任:「3690係最低工資數嚟,馬會injury payment嗰幾份文件有寫你嗰幾個月的人工係點嚟。(嘩,白紙黑紙仲同我玩野) 其實我唔太清楚你個case,我唔知你係part-time staff,以為你有418,(我馬會糧單大大隻字寫住part-time staff,而且你都見我時薪係幾錢一粒鐘,一個月頭得嗰1600左右點計都冇418啦,阿姐,係咪咁玩呀?) 因為只係見你糧單寫住periodical payment,再加埋馬會封信話你injury sick leave pay咪以為你病假津貼囉」 我:「下,我一直都同何姑娘講我係工傷喎。勞工處的信都俾咗你,你話你唔知?我有勞工處話我冇判到傷封信,仲有埋僱主唔可以出少過幾多錢的糧俾我」 主任:「係囉。但我冇呢D文件喎」 我:「嗰日交俾你地嗰陣可能係冇收到呢,只係望咗兩眼。不如我宜家scan返D文件再send返去今朝個電郵到俾你。」 ================================== 主任:「我宜家收齊晒你成套文件,就清楚晒成件事喇。你放心嗰8000幾蚊係你的資產嚟,我地係唔會收咗你。嗰三個月扣起咗入息上繳的錢都會俾返你,我地計好晒再話返條數你知。」 我:「咁你地當係資產咁我咪要同破署講返。」 主任:「唔係。係我地社會保障條例當係資產姐。其實破署又有另外的條例,又唔同計法。我地計好晒條數會再打返電話俾你。」
我其實同咗破署主任講過我工傷,但佢又冇咩特別,只係話如果有賠償的就要話返俾佢知。咁我嗰筆只係純粹薪金,所以都冇咩嘢。之前仲因為工傷睇醫生claim醫生錢馬會入埋落份糧到,主任話我medical照寫返出嚟,咁兩邊一加一減即係冇。 講真,社署的辦事能力我真係好存疑。我心諗我唔嘈到咁大,你咪食埋我嗰8000幾蚊?我有時會覺得佢地計錯同做錯,但攞綜援嗰個又唔出聲,所以好多時自己食死貓。 方向日報有一刻係想誤我出嚟幫佢做新聞,可惜唔成功,仲俾我駁返佢灌輸俾我的謬誤。仲話佢地查咗好多綜援受助人係唔受勞工法例保障,話工傷好多都冇賠償。我話工傷賠償舊錢大當然要交出嚟,交咗出嚟又超過咗資產限額當然係冇資格拎綜援。 總之,唔合理的一定要出聲。當然要同對方講數的,自然要搞清楚晒咩條例同埋佢地個遊戲規則!當你分辯到而且可以有好段你講得啱但佢又唔多明的時候,佢就唔會當你係蝦條同薯條,自自然然會聽你講埋落去。最後,知道自己企嚮咩位置係好緊要,切記切記!
使用道具 舉報
本版積分規則 發表回復 回帖後跳轉到最後一頁
小黑屋|破產聯盟
GMT+8, 8-9-2024 10:07 , Processed in 0.044725 second(s), 20 queries .
Powered by Discuz! X3
© 2001-2013 Comsenz Inc.