破產聯盟

標題: 關於蓄意唔還錢，感謝。 [打印本頁]

作者: purple 時間: 20-11-2015 05:05
標題: 關於蓄意唔還錢，感謝。
感動終於能註冊，因不太懂這些，驗証問題又深，攪左好耐，終於按到條中國移動，而且板主真的很抱歉，我是史前人，沒有e-mail，所以那行是亂打的，對不起。
我有看過你說發問前請先爬文，但我看到出破產令前追數那個問題時，按到手機制關了頁面，然後搵唔番路入去。
當然這裏不是教用網路的，所以我想問的問題是：如何阻止收數打去舊公司和會否被告蓄意唔還錢。
我的情況是，現在欠邦X十五萬多，只有這條，現在失業，十一月呢期已經冇供，供緊六千幾，不會考慮重組那些。
因為看過你說要三個月至六個月冇攞個錢先可以申請，（最後當然是跳頁後又搵唔番路入去睇,所以越睇越唔明）。
我呢條數由幾萬開始借到而家十幾萬，經已有幾年，點解而家會想破產，係因為今年年頭左右，覺得自己精神出左小小問題，所以做埋果個月便離左職，最衰係剛離職時拎左之前張糧單去加大左個額，由十萬加到十五，但當時真係冇諗過唔還，之後去過一次旅行，然後便是輾轉去了政府精神科到而家。
其實前幾星期有好轉後經已諗住做番野，點知跟住整親隻腳，到而家都未好，有在醫院照X光，所以今期供款經已無力償還，總之就電視劇情咁啦，係而家呢個最山窮水盡的時候，我頭先仲跌埋張八達通，真係諗緊駛唔駛去車公廟轉風車。
經考慮後，我份人自制能力又唔好，所以說唔考慮重組，因借唔到一了百了。
有爬過我這網痴能爬到的文，看到很多回答說第一期未會點理，第二期先會打去公司和十幾天才到收數，所以想問
（1）這幾天我沒接邦x電話，反正小熊攔左，我是否該致電佢地我經已失業和未有錢還，因我成副身家經已得番雙位數，真係小小都還唔出。同埋我事實上也冇響果度做，失業很久，咁就唔駛人走左咁耐仲打去搵。
（2）我之所以把失業後睇緊精神科寫出黎，係想問我咁樣情況，會唔會比人告蓄意唔還，因冇做野後曾把個額加大，但我當時冇諗過唔還，之後真係受情緒困擾，冇出家門，到而家攪到咁大，真係無力償還。
感謝你們看呢篇比小說更長的發問，希望指點一下，因我真係唔太懂在網路爬文，謝謝。

作者: flypig 時間: 20-11-2015 07:48
1 借完錢最好頂三個月，但如果頂唔順去申請破產一般不成問題。兩者差別係理論與實戰的觀點不同。事實上，呢版唔少人係借錢三個月內申破的。全無問題。
2 申了破，有檔案號碼，通常追數會停。但沒有100%保證。

作者: cc4321 時間: 20-11-2015 08:08
你唔考慮重組咁你都要有錢申破,自己搞都要幾千銀,你工又無錢又無,所以講到尾都要搵返份工先

作者: flypig 時間: 20-11-2015 10:19
老破預 15K...
自己搞預 10K...

無水收得皮!!!!

作者: admin 時間: 20-11-2015 10:42
樓主。

個人意見。

蓄意唔還錢 = 有錢但唔去還

無能力還錢 = 根本無錢，點還

兩件事

作者: itsme 時間: 20-11-2015 11:46
如何阻止收數打去舊公司？無得阻止，你連電話都唔接，打公司電話搵你好正路。你應該自己打返畀佢，諗個藉口拖一拖，譬如話，整親隻腳入咗醫院，唔方便開手機，出院會入數。然後盡快申破，大前提係你最少要有9千幾蚊。至於會唔會告你？我自己睇法，加大個額之後，唔係一次過攞晒出嚟，逐啲逐啲咁用，畀人告欺詐嘅機會唔高。即使一次過拎晒，銀碼咁細，講緊5萬蚊，仲要係年頭嘅事。而你用舊公司糧單去加額件事，係可以追究，不過事隔咁耐，唔一定會查。

作者: purple 時間: 20-11-2015 18:08
感謝各位，原來蓄意唔還錢 = 有錢但唔去還，申了破，有檔案號碼，通常追數會停。但沒有100%保證。那想再問自己入紙和有律師入紙，對於停止追數的時間方面有無影響，因看見很多廣告說半小時內停止追數。

作者: wingcat 時間: 20-11-2015 18:24
影響係你唔知d野點填就會遲宣誓，律c無保證半小時會停止追數，因為宣誓後要交文件俾法庭，fax法庭封信俾錢行先會停到電話追數。所以點都要2個工作天啦

作者: flypig 時間: 20-11-2015 20:02
本帖最後由 flypig 於 20-11-2015 20:04 編輯

purple 發表於 20-11-2015 18:08
感謝各位，原來蓄意唔還錢 = 有錢但唔去還，申了破，有檔案號碼，通常追數會停。但沒有100%保證。那想再問 ...

如果律師做埋收數，又剛好收你條數就有可能。
有數計：1 經律師：填完表對一輪。約去宣誓。再等埋其他的分行，一般3/5/7日不等。你預10日預鬆少少。
2 如果自己去破署搞，就真係即日有。不過要事先最好功夫。一早搞定mpf ，印定稅單 etc.

作者: purple 時間: 21-11-2015 02:06
謝謝各位,再想問一下，若我已找到朋友借錢申破，我需要解釋呢筆錢點黎嗎，因一直冇做野，銀行只有雙位數。

作者: cc4321 時間: 21-11-2015 07:29

purple 發表於 21-11-2015 02:06
謝謝各位,再想問一下，若我已找到朋友借錢申破，我需要解釋呢筆錢點黎嗎，因一直冇做野，銀行只有雙位數。 ...

我都係問人借錢申破,無需要解釋

作者: purple 時間: 21-11-2015 09:17
明白，感謝大家的解答，謝謝。

歡迎光臨破產聯盟 (https://hkiva.org/)