入學前後二三事 【經驗分享指南】(1)

Cheung89

由六月開始搞，到今日成功拎開戶信開埋戶口出糧，多謝咁多位師兄師姐解答問題，而家到我總結返下前前後後啲經驗分享比準備入學／剛入學的同學仔，希望可以幫到少少手。

有錢請找6C，勿比中介呃
巿面有好多話幫手申請貸款又話幫手申請「特別破產」的中介公司，好多到最後都係昆事主借多舊錢比佢地做中介費，到事主申請左破產後就成間消失聯絡唔到。
破前三個月借大舊錢係坑係坑係坑！
破前三個月借大舊錢係坑！
破前三個月借大舊錢係坑！（重要的事講三次）

如果係咁樣借左之後只能自己申破，因6C不接破前三個月借過大筆數的案件，而正式破後破署實問你舊錢去左邊。

如果你真係仲有餘錢，怕自己唔識填表填漏野會延誤頒令，請你直接搵6C啦。尤其是資產比較多又複雜（有車有樓又有其他野供緊，開公司等等），比多少少錢搵6C咨詢好過之後有乜問題煩死自己。呢啲情況上黎問師兄師姐都未必可以好精確咁答到，最後有手尾就唔好嘞。

普通CASE搵6C比大約14XXX-15XXX，比資料佢地就會幫你整好哂文件交上去，實際費用請自己問返。一般情況下係包填文件，入紙拎NO.，比份26頁文件你，幫你上庭，同埋最後寄份破產令比你。至於26頁初步訊問同之後傾生活費、交年報等等如要繼續找6C幫忙是另外收費的。呢D就可以喺論壇問返師兄師姐經驗，自己填都得，小學數自己計到的。

如果真係山窮水盡，唔想額外花錢，可以睇返論壇有好多過來人帖教點樣自己申請破產。由填表到入紙到出庭都有人寫過帖，可以參考返。

疫情期間比較特別，由入紙到頒令需時比正常長好多，之前有師兄分享過填表出左少少問題，臨頒令又被打回頭，要等多兩個月先正式頒到。如果仲負擔到，疫情期間建議交比6C搞啦。

關於追數
我個人經驗：
只有欠三間一線，分別係依哦、痕身同旗仔。
三間我都一路有還起碼MIN PAY，一個月都冇甩。計好時間由入紙到拎到NO.中間完全冇追過數。唯一係依哦在6C FAX完NO比佢後，SMS叫我交錢，我打上去話冇收到一定要email send多次NO比佢，send左後打佢客服熱線確認完就都係冇聲氣的。
所以如果真係還唔到，及早入學免得被追數煩到自己又煩到屋企人。

如果係已經欠一線（即係銀行／大間的財仔）一段時間，交左去收數部門，會追到你入紙拎到NO（法庭收到你破產呈請後果張有法庭印同檔案編號的文件）。
如果欠二線果啲，睇返師兄師姐經驗，通常會追到正式頒令。打電話去公司、上門拍門等等都有，按香港法例佢地在你拎到正式破產令前係合法的，所以只能熬過去。
如果係三線，可能再追多一年半載都未定；電話財就更加係正式令黎埋都照追，可以的話搬屋啦……

過程中如果好擔心，建議在家門口裝返個閉路電視，去深水埗買眼仔，有咩事上黎可以報警備案。

關於銀行追數流程，參見以下呢個POST：
http://www.hkiva.org/forum.php?mod=viewthread&tid=995&extra=page%3D1

唔想屋企人知，又冇朋友地址可借？郵政信箱同郵政轉遞幫到你
一般郵局小型信箱370一年
https://www.hongkongpost.hk/tc/r ... es/pobox/index.html

郵政轉遞（由屋企地址轉去郵箱）
最初三個月136，之後六個月172
https://www.hongkongpost.hk/tc/receiving_mail/redirection/index.html

郵箱同轉遞申請攻略
http://www.hkiva.org/forum.php?mod=viewthread&tid=23008
仲有一招係租迷你倉信箱，我冇用過，有興趣的話請另外出POST問下。

留意返搞掂哂上述服務要約2-3星期，想完美避開一切寄左信去屋企比人拆左ge風險，請預返足夠時間處理。

eddykung044

未入學的人見到樓主的話
相信唔會搵中介

CCChi

多謝c 兄分享

Cheung89

定期頂上黎等準備入學嘅朋友睇到，免被人呃

square3207

Very good。幫到好多人

hsiaojang

請問三個月內借錢定義 信用卡透支一兩萬交min pay 算唔算呢？多謝師兄解答先

Cheung89

hsiaojang 發表於 4-11-2020 00:43
請問三個月內借錢定義 信用卡透支一兩萬交min pay 算唔算呢？多謝師兄解答先 ...

卡冚卡呢啲好常見，你唔特登同6C提出佢通常隻眼開隻眼閉。

三個月內借錢通常係講緊超生活費一截，而你借貸款又一期都冇還，破署或外判問你，你自己都知答生活費用左都冇人信果啲。

hsiaojang

Cheung89 發表於 4-11-2020 01:49
卡冚卡呢啲好常見，你唔特登同6C提出佢通常隻眼開隻眼閉。

三個月內借錢通常係講緊超生活費一截，而你借 ...

多謝解答 我仲諗住透支律師費XDD
應該無問題掛？

Cheung89

hsiaojang 發表於 4-11-2020 09:01
多謝解答 我仲諗住透支律師費XDD
應該無問題掛？

嚴格上就梗係唔建議架喇，但實際上有好多人係咁做，而條數唔大大多數都冇人捉。山窮水盡大家明嘅。

盡量唔好一透支完即刻破啦，有機會要你之後嘔返出黎架。可能嘅話透支完都還返多少隔返一頭半個月，人地問起你都好答啲。

咁光明正大話「我透支黎破」，當你詐騙架，明知還唔到仲借.....

rain1220

死啦，我中坑

rain1220

Cheung89 發表於 4-11-2020 11:12
嚴格上就梗係唔建議架喇，但實際上有好多人係咁做，而條數唔大大多數都冇人捉。山窮水盡大家明嘅。

盡量 ...

慘啦

Cheung89

rain1220 發表於 4-11-2020 20:51
慘啦

你破前借落好大筆？萬零二萬蚊果啲有機會唔理，也有機會叫你分期比返

hsiaojang

Cheung89 發表於 4-11-2020 11:12
嚴格上就梗係唔建議架喇，但實際上有好多人係咁做，而條數唔大大多數都冇人捉。山窮水盡大家明嘅。

盡量 ...

好在問過你 咁我明點做喇 唉

Cheung89

hsiaojang 發表於 4-11-2020 22:36
好在問過你 咁我明點做喇 唉

兄弟加油呀。最難捱其實係前前後後未搞，要等果啲時間

Anmi2019

好有心嘅分享，每隔1段時間要推噃上去(ง •_•)ง加油

vvk

真係5好揾仲介，自己死蠢搵仲介，白白用左8皮，好在爆晒卡冇得透支

vvk

最后都係要搵3姓6C,但做野好慢……要半個月先可以宣誓

Cheung89

推一推，希望唔好再有準備入學嘅同學仔比人呃啦

早知今日

約左星期三上去三姓宣誓、心情好忐忑…希望平安過渡

Cheung89

早知今日 發表於 16-11-2020 14:57
約左星期三上去三姓宣誓、心情好忐忑…希望平安過渡

自己定啲呀同學仔，宣左誓就已經差好遠