【經驗分享指南】入學前後二三事 (2)

Cheung89

入紙前準備的文件

1.     戶口月結單（3-4年，如無的話有咁耐save咁耐。唔駛印出黎住）

2.      信用卡月結單（同上）

3.     資產相關資料（車啊樓啊果啲）

4.     強積金戶口資料（強積金公司名，戶口號碼，供款結餘。記得係有幾多個戶口要全部報哂）

搵律師搞要準備的文件
我係搵律師入紙的，自行遞表請參考其他PO。

1.     戶口月結單（最近3個月）

2.     信用卡月結單（最近3個月）

3.     資產相關資料（車啊樓啊果啲）

4.     強積金戶口資料（強積金公司名，戶口號碼，供款結餘。記得係有幾多個戶口要全部報哂）

5.     大概計個你估你欠債權人的數（律師會直接再問債權人的）

6.     每月人工

7.     每月生活費的約數（租金、差餉、管理費、食飯、電話費、寬頻費、供養父母、子女學費書簿費補習費、交通費、長期病藥費等等）

宣誓到拎到NO要幾耐？
如果你文件齊，交齊錢，律師會叫你即日宣埋誓的。如果唔係即日，就要睇律師果邊約你幾時再上去交埋尾數，通常一星期左右。

正常宣誓後，幾時會入到紙拎到NO，係要睇律師樓負責拎文件去法院果個人幾時出開去的。短則第二日已入紙，長則一星期左右，如果等左成個星期都未得，請打電話聯絡返佢地個負責人啦，宣誓後佢地會比個相關電話號碼你的。

特別情況就係之前法院唔開，之後啲案件積到有排清，咁ge情況應該律師樓都答唔實你，上論壇同大家交流下啦。

入紙前溫馨提示：
記得戶口啲錢拎哂出黎呀，一入就全部凍左，到時拎唔到架。申請一次解凍好麻煩的，申得黎有啲師兄姐話正式令都頒埋了。同埋痕身係出左名你申請都唔會攞到錢，記得記得記得拎返啲錢出黎食飯呀。

Anmi2019

Anmi2019 發表於 5-5-2021 03:57
搵到關於申請頒令前解凍銀行戶口個程序資料 https://www.judiciary.hk/zh/cour ... lities/hcf_cfi.html
1 ...

依個要留意呀! 依個要留意呀! 依個要留意呀! 搵到關於申請頒令前解凍銀行戶口個程序資料 https://www.judiciary.hk/zh/cour ... lities/hcf_cfi.html
1. 申請解凍銀行戶口 – 參考指引
2. 申請解凍銀行戶口 – 傳票
3. 申請解凍銀行戶口 – 誓章

通常同入紙(交呈請書)時一齊申請埋, 經律師樓申請一定會收你錢.
之前有同學分享過, 等上庭, 之後仲要等份解凍令, 中途你可能已經成功頒咗令, 搵破署主任/外判拎開/解信, 仲快過佢.
如非萬份必要, 唔好嘥錢, 嘥時間去申請.

Cheung89

入紙後拎到律師樓寄來的呈請相關文件和26頁初步訊問
到呢步可以放鬆少少嘞。呈請相關文件就係有法庭同檔案編號，俗稱NO果兩張紙。正常律師樓喺入紙後一兩日就會幫你FAX通知哂債權人，一線銀行同大財仔收到後就會停追數。如果真係仲有人追你，唔駛慌，打上佢地客服搵追數部門，拎個FAX no 或email，send返果張NO比佢地就得架喇。

提一提，我個人經驗係痕身會寄封信黎，叫你帶同剪左的信用卡比返佢地任何分行，而旗仔銀行係會一個月出一次信，話你而家戶口總共欠佢地幾多錢。旗仔果個收左就算，有時銀行個系統會一路係咁自己出statement的。

依哦美名在外，好多分享話FAX佢地真係奉旨收唔到……唔想搏的話直接打佢地hotline，話「我入左紙破產，請問點比返相關文件你地？」等佢地話你知點做啦。

入紙後準備的文件（準備填26頁初步訊問同生活費）
填之前請影印多兩份，如果真係填錯好多直接填份新架啦。因為26頁係唔可以用塗改液，填錯只能刪除再在旁簽名。

1.     戶口月結單（3-4年，如無的話有咁耐save咁耐。唔駛印出黎住，等頒令後主任／外判話你知佢要睇幾耐。如果你真係冇save到，去銀行問返佢地Print啦，有啲銀行要交手續費有啲唔駛）

2.      信用卡月結單（同上）

3.     資產相關資料（車啊樓啊果啲）

4.     強積金戶口資料（強積金公司名，戶口號碼，供款結餘。記得係有幾多個戶口要全部報哂）

5.     糧單／稅單（如果你冇，即係自由業者／出現金糧／兼職等類，請去稅務大樓1樓，查詢果度問佢拎IRC2815同IRC2816。個職員如果問你做咩要拎，直接話係破署果邊要就得）

6.     過去一年租金、差餉、管理費、食飯、電話費、寬頻費、供養父母、子女學費書簿費補習費、交通費、長期病藥費等等的單據，影印定哂放File

7.     環聯報告（呢個係睇外判要求的，有啲外判唔需要，等正式頒令後聯絡左交文件果時問清楚啦）

戶口凍結左，令又未頒令冇開戶信，我點出糧？
之前申破頂多一頭半個月，可能咬咬牙捱過去就算。今年疫情好很大鑊，動輒等成3-4個月先頒令，呢段時間點過呢？

如果你本身現金出糧就冇問題啦，或者你公司肯出現金票／冇劃線支票，咁就直接去銀行拎身份証出黎攞現金就得。

一定要用戶口出糧的話，請去返冇牙齒印的細銀行，開個儲蓄戶口頂住先啦！
冇牙齒印即係你冇欠佢地錢，至於點解揀細銀行，係因為佢地通常個資料庫Update得冇咁快，你可以用的時間會長啲。呢度大家通常選用的細銀行有：永０、小新、創星、冬亞。

拎到NO至正式頒令呢段時間內開新戶口係不違法ge，開完記得喺26頁資產果部分填返你呢個戶口係邊間銀行同個戶口號碼就得。

失敗到極

Cheung89 發表於 15-6-2021 02:34
定啲黎，還MIN PAY佢地就唔會掉去收數部門。你就返好啲時間，截數日還完MIN PAY去申破，時間夾得好完全唔 ...

師兄，請問如果頂唔到唔止冇還一個月，銀行到時交咗去收數嘅係咪我一有number俾佢就會唔會追我？

Cheung89

填26頁初步訊問同生活費
如果你係經律師搞，入面關於資產的部份基本上律師已幫你搞掂哂，除左上述話暫時開左個戶口出糧要填返落去，其他如實申報就得。有咩唔清楚可以開PO問下師兄師姐，實在唔知點填／填得唔清楚，主任／外判到時會問你，佢地會話返比你聽點填。不適用果啲直接刪左個格就得，記得每頁最後都要簽名呀。填完哂自己影低佢，到時人地問起你，你自己都答得出。

生活費果張野，另外搵張白紙，對住上面準備好果啲文件計返一次成年平均數先再填落去啦。具體批幾多，要睇係跟主任定外判。外判亦都間間唔同，有啲鬆手有啲緊手，但多數係人工高，批得鬆手同時亦都要上繳多啲。

頒令前收到破署信，點樣分辨暫時主任/直接外判跟，佢哋跟有咩分別
詳情參見AMI師姐個PO：
http://www.hkiva.org/forum.php?mod=viewthread&tid=22022&extra=page%3D1

主任跟就手鬆啲，外判跟通常生活費會緊啲。就算暫時主任跟，之後都有可能再彈比外判（要再傾過生活費），所以直接外判其實有度好就係4年唔駛煩。

頒令後收到破署信（直接外判）
疫情關係，我收到聯絡外判封信果時，距離正式頒令都過左成兩星期。收到信之後即刻打電話上去外判度，約時間上去交文件加傾生活費。

打電話上去果時記得問清楚佢地要你交乜野文件，開錄音。有啲外判講野極高速，一時MISS左帶漏野就唔係幾好嘞。

出發前check多次你文件帶齊未，26頁每頁都簽好名。又，如果你同我一樣係兼職多個個月工資唔同，關於薪金証明佢係叫我影印左簿仔，再間返哂邊啲係收入除返咁多個月計平均數。由於我呢排真係收入極不穩定，我跟的外判（劉Ｘ雄）好好人話我自己都養唔掂唔駛上繳。叫我到時收入穩定返（可能連續幾個月個數上返去）先再打比佢地傾過生活費。傾好生活費後記得影返佢批幾多果張紙相，之後填報表就係果張紙上啲數乘12，如果收入唔夠支出，就寫返係邊個資助。當日亦比埋四年年報我，提我邊日要準時交，唔係的話佢地會追。

佢地係絕對唔接受郵政信箱做地址的，所以可能睇下有冇師兄師姐可以分享填迷你倉地址得唔得。

實際生活費批幾多到時知係跟邊間外判先再問呢度跟同一間的師兄師姐會準啲，就咁問真係可以天差地遠。可以的話據理力爭得黎，對外判都保持禮貌寬容啲啦，話哂都要跟四年，無謂自己搵自己黎搞，畢竟最後不反對通知書仲要佢地批的。

Cheung89

關於開戶信
正常黎講之前的銀行戶口係全部凍結哂，綜合戶口係唔可以解凍返黎用的。如果你之前用緊的係普通儲蓄戶口，而你又想用返，請你先去銀行問下可唔可以解先拎解凍信。又，你想開個新戶口也好，去銀行問一問佢地比唔比破產人士開儲蓄戶口先再同外判講話你要開邊間。

我個case係因為太遲收到破署信，聯絡唔到外判，到我想解凍果時去問小新，小新話已經直接關閉左我本來個儲蓄戶口。睇返之前啲PO，係有師姐成功解凍過的。

而睇返過去的PO，獅子、痕身同祖國有好多人用到，但亦有人係唔知點解呢兩間唔做佢地生意的。銀行要唔要接係商業決定，我地吹佢地唔脹。總之要外判出信比你前，問左銀行先，費事又要走多轉。

我自己係去返小新開新戶口。帶同身份証、開戶信正本同住址証明，行埋去搵開戶果啲職員整左約半個鐘就得，搵經理開左本簿仔比我。全程冇比面口我睇，亦有禮貌。小新係得簿仔，提款卡都唔申請得的。

如果係想要online banking，提款卡，祖國銀行、痕身同創星都好多師兄師姐話OK。好似我呢啲出票的用簿仔到時方便影印都冇乜唔好，起碼我屋企樓下同返工果度就有小新，平時都唔駛排隊。

日常生活小提議
想網上買野，用FPS收下錢，可以準備定以下電子支付方式：
Tap & Go：去7仔可以買到實體卡，有銀聯同mastercard款。可以用到銀聯雲閃付，如果要在HKTVMall買野，用銀聯可以比到錢。平時收master的地方都會照收佢張卡，去超巿買野唔想排隊用自助、google play想課少少金都可以用。重點係可用FPS比錢同收錢。

O! epay mastercard：佢係八達通個APP度連住的，同Tap & Go差唔多，但冇實體卡。如果係果啲保安程度高啲網站買野，佢會要你入個一次性密碼，Tap & Go係冇而呢張係有的。呢張都可以用到FPS，但相對冇Tap & Go咁完善，用唔到FPS CODE的。

支付寶／WeChat Pay：唔係卡，係電子錢包。而家都多左好多地方用得，嘟QRCode。

用得呢啲，請千萬千萬千萬唔好連落個銀行戶口度過數，啲數出出入入，比主任／外判見到隨時可能又問你呢樣係乜果樣係乜。上述全部都可以直接7仔OK入現金增值，乖乖地入現金啦。

開返個新戶口，就可以安心過四年喇。中間人工、地址果啲有變記得通知主任／外判。自己主動啲，其實麻煩會仲少。

Cheung89

入學前後二三事 【經驗分享指南】

由六月開始搞，到今日成功拎開戶信開埋戶口出糧，多謝咁多位師兄師姐解答問題，而家到我總結返下前前後後啲經驗分享比準備入學／剛入學的同學仔，希望可以幫到少少手。

有錢請找6C，勿比中介呃
巿面有好多話幫手申請貸款又話幫手申請「特別破產」的中介公司，好多到最後都係昆事主借多舊錢比佢地做中介費，到事主申請左破產後就成間消失聯絡唔到。破前三個月借大舊錢係坑係坑係坑！
破前三個月借大舊錢係坑！
破前三個月借大舊錢係坑！（重要的事講三次）

如果係咁樣借左之後只能自己申破，因律師不接破前三個月借過大筆數的案件，而正式破後破署實問你舊錢去左邊。

如果你真係仲有餘錢，怕自己唔識填表填漏野會延誤頒令，請你直接搵律師啦。尤其是資產比較多又複雜（有車有樓又有其他野供緊，開公司等等），比多少少錢搵律師咨詢好過之後有乜問題煩死自己。呢啲情況上黎問師兄師姐都未必可以好精確咁答到，最後有手尾就唔好嘞。

普通CASE搵律師比大約14XXX-15XXX，比資料佢地就會幫你整好哂文件交上去，實際費用請自己問返。一般情況下係包填文件，入紙拎NO.，比份26頁文件你，幫你上庭，同埋最後寄份破產令比你。至於26頁初步訊問同之後傾生活費、交年報等等如要繼續找律師幫忙是另外收費的。呢D就可以喺論壇問返師兄師姐經驗，自己填都得，小學數自己計到的。

如果真係山窮水盡，唔想額外花錢，可以睇返論壇有好多過來人帖教點樣自己申請破產。由填表到入紙到出庭都有人寫過帖，可以參考返。

疫情期間比較特別，由入紙到頒令需時比正常長好多，之前有師兄分享過填表出左少少問題，臨頒令又被打回頭，要等多兩個月先正式頒到。如果仲負擔到，疫情期間建議交比律師搞啦。

關於追數
我個人經驗：
只有欠三間一線，分別係依哦、痕身同旗仔。
三間我都一路有還起碼MIN PAY，一個月都冇甩。計好時間由入紙到拎到NO.中間完全冇追過數。唯一係依哦在律師FAX完NO比佢後，SMS叫我交錢，我打上去話冇收到一定要email send多次NO比佢，send左後打佢客服熱線確認完就都係冇聲氣的。
所以如果真係還唔到，及早入學免得被追數煩到自己又煩到屋企人。

如果係已經欠一線（即係銀行／大間的財仔）一段時間，交左去收數部門，會追到你入紙拎到NO（法庭收到你破產呈請後果張有法庭印同檔案編號的文件）。
如果欠二線果啲，睇返師兄師姐經驗，通常會追到正式頒令。打電話去公司、上門拍門等等都有，按香港法例佢地在你拎到正式破產令前係合法的，所以只能熬過去。
如果係三線，可能再追多一年半載都未定；電話財就更加係正式令黎埋都照追，可以的話搬屋啦……

過程中如果好擔心，建議在家門口裝返個閉路電視，去深水埗買眼仔，有咩事上黎可以報警備案。

關於銀行追數流程，參見以下呢個POST：
http://www.hkiva.org/forum.php?mod=viewthread&tid=995&extra=page%3D1

唔想屋企人知，又冇朋友地址可借？郵政信箱同郵政轉遞幫到你
一般郵局小型信箱370一年
https://www.hongkongpost.hk/tc/r ... es/pobox/index.html

郵政轉遞（由屋企地址轉去郵箱）
最初三個月136，之後六個月172
https://www.hongkongpost.hk/tc/receiving_mail/redirection/index.html

郵箱同轉遞申請攻略
http://www.hkiva.org/forum.php?mod=viewthread&tid=23008
仲有一招係租迷你倉信箱，我冇用過，有興趣的話請另外出POST問下。

留意返搞掂哂上述服務要約2-3星期，想完美避開一切寄左信去屋企比人拆左ge風險，請預返足夠時間處理。

Cheung89

哎XD 頭果忽冇注意用字要審核先過到添, 我白痴仔...

sosadnow

謝謝C兄，慢慢睇完消化，有唔明再請教

wch288

謝分享

Cheung89

sosadnow 發表於 2-11-2020 18:01
謝謝C兄，慢慢睇完消化，有唔明再請教

唔駛客氣，大家互相幫助。關關難過關關過啦

CCChi

真係好詳細，多謝哂，準備入行

Cheung89

CCChi 發表於 2-11-2020 22:59
真係好詳細，多謝哂，準備入行

幫到你就好。有唔明可以再問~定期幫手頂下PO等其他朋友可以睇到XD

CCChi

我宣左誓，我想問c 兄知唔知，一線財仔we 仔，同兄弟追數點，會唔會來屋企騷擾拍門？謝謝回覆。

Cheung89

CCChi 發表於 2-11-2020 23:33
我宣左誓，我想問c 兄知唔知，一線財仔we 仔，同兄弟追數點，會唔會來屋企騷擾拍門？謝謝回覆。 ...

WE仔聽講追得比較進取，有師兄師姐話會拍門，可能都持續一段時間；至於兄弟睇你拖左幾耐啦，一般會係電話先，之後先上門。

兄弟一有NO就會停架喇，你拎到NO佢都仲追你你就拎住份野隨便入一間分行，叫啲職員幫你FAX或者比個FAX NO你自己搞，搞完記得打電話去confirm佢地收到未，錄埋音就冇死。

eddykung044

多謝分享

CCChi

師兄cheung89 ,我10月29日宣誓，揾6c 攪，知唔知大約幾時正式頒到領

Cheung89

CCChi 發表於 3-11-2020 08:16
師兄cheung89 ,我10月29日宣誓，揾6c 攪，知唔知大約幾時正式頒到領

而家好似通常要3-4個月先頒到，睇近期啲PO。一入紙拎到NO你都返黎講一講啦，之前見就多數3個月

Cheung89

eddykung044 發表於 3-11-2020 01:20
多謝分享

加油~上黎HEA下時間好快過

Oogaoo

師兄—-支持好貼分享！

square3207

Very good.幫到好多同學仔。

CCChi

今天攞到個NO 要排到29-12-2020 想問問6C fax 去左d 債權人到，一線財仔 we 仔，兄弟仲會唔會上門追？