準備申請破產，有幾個問題請幫忙

siugangan

大家好，本人準備月尾入紙申破，想等到28號出左糧先去搞，想慳錢所以打算自已搞，己爬過好多文，但還有一些問題想問，希望大家能解答一下

1. 已去積金局Print 左強積金戶口資料，但只列有兩個舊有工作用o強積金公司資料，問佢地話只會列出舊有的，現有工作的不會列出(現工作用匯豐強積金)，咁係咪我填表時自已加返匯豐的就得，但我記得仲有一間係之前做地盤時去中資銀行開的，果時做左幾個驫都供左幾千蚊之後冇做就冇理到，但我唔見佢個表有列出黎，咁入我洗唔洗填？而我自已都唔係好記得呢個戶口的資料了

2. 見呢度好多Post 都教開個永隆戶口做出糧，我仲未去開，而我本身用緊中銀出糧的，我爭落d數其中都有差中銀卡數大約5萬幾，如果我申破，破產後如拎到開戶信，中銀會比我用返個戶口出糧嗎？另原本我打算等出埋今個月糧(28號) 先去搞破產，但差星展果筆可能拖唔到了，佢地只肯比我拖到19號，呢筆數我都順供左兩年，正常9號autopay,兩年間試過3次遲還但都係限期前還冇上TU,今次就真係捱唔到，如果我提早28號前入紙，我中銀個戶口會否馬上被凍結出唔到糧？

3. 我睇破產準備個Post 只係話要準備mpf 資料，冇講話要3年稅單，但我之前google 過又話律師會要你要準備3年稅單(但我唔係搵律師搞),咁其實需唔需要？因為如果要就要請假搵時間去稅局拎，又係一個問題…

4.本人從事跑數行業，過去兩年平均都搵到兩萬以上，今年年中幾個月都兩萬幾，但公司加target 加上市道好差同競爭當手出招導致生意下滑，近呢3個月收入大跌，出一萬都試過，可見將來都唔見得會有轉機，想問我申破時雖然話生活費同搵幾多係我自已填，但破產局會唔會見我以往都搵2萬而用2萬同我計要我還幾多架？

5. 因為申破唔想比屋企人知，另本人已申請郵政信箱，已寄信比我叫我去拎匙，準備一拎到就申請埋郵遞轉寄，但我驚申請到轉寄前破產局就寄信比我，想問一般是否頒令後才會有信寄比我？

6. 填支出時，本人已婚未有子女，我老婆係國內人，大約仲有一年先拎身如份證，而佢係國內有工作叫做自已搵自已洗，佢唔知我欠人好多錢，但金錢上對我冇乜要求，但基於我為人丈夫，我一有鬆動都會有錢比佢幫補下佢生活，雖然唔多每次幾千咁，對佢我亦好內疚，打算申破後可以固定每月比3-4千佢，如果我申報時照填要供養老婆咁有冇問題呢？

7. 同上，本人同阿媽細佬一齊住公屋，間屋已買，我媽自已搵到錢
，但基於要我地負D責任關系都要我地比少少家用，咁我媽要我比兩千當交租的，因為欠債都搞到有時會遲左比，我報支出時照報供養母親，銀碼稍為報返大d例如4千，可以嗎，因都預左佢還價，但會否因為我母親有工作(自顧)，而唔批我供養母親呢筆錢？

8. 最後一個問題，本人這兩年染上賭波，開始都贏，當然之後都輸啦，咁用開馬會流動投注戶口，經銀行轉錢入落個戶口賭的，即係銀行月結單個個月都會有幾筆Hkjc 過數顯示出黎，雖然賭得唔算大，每次幾百幾百咁但一個月加起上黎都過千，呢個唔算我破產主因，但會否對我申破有影響？我網上查過好似係自已做生意而又賭先會犯刑事，同埋我係咪要入紙前就去馬會取消左個戶口佢？當然現在我已停了賭波

Sorry 一次過問左好多問題，但真係搵唔到答案，希望有經驗的師兄師姐幫幫忙，感激不盡

flypig

2. 破產後如拎到開戶信，中銀會比我用返個戶口出糧嗎？
主任外判決定....
如果我提早28號前入紙，我中銀個戶口會否馬上被凍結出唔到糧？
中銀據報申破後極速FREEZING(2/3日)你大有巴絲打在
而且仲係入到出唔到個隻!!!!
3. 因為如果要就要請假搵時間去稅局拎，又係一個問題…
半日時間唔好省....唔好搞到自己時間好似好寶貴. 應付老破都係抽下時間咁.....
我對申破的態度係設定為 PRIORITY ONE !!!(除突發事故)
4.破產局會唔會見我以往都搵2萬而用2萬同我計要我還幾多架？
非以 搵幾多做基本考慮.
設定為 基本生活費做BASE. 跟住先以搵幾多 減以生活費=上繳費
如果搵少左,基本生活費(即BASE) 係不變的.搵多左,上繳多D.
5. 因為申破唔想比屋企人知，另本人已申請郵政信箱，已寄信比我叫我去拎匙，準備一拎到就申請埋郵遞轉寄，但我驚申請到轉寄前破產局就寄信比我，想問一般是否頒令後才會有信寄比我？
一般唔會.但不能保證.因中間有甩漏,年報問題而出信亦偶見.追年報更唔係咩特別(仲會寫住你寄左就可以唔理,可見破署有 PROCEDURES, BATCH 地
SEND 信)

6. ，如果我申報時照填要供養老婆咁有冇問題呢？
有問題!!!但可以照博.
7. 同上，本人同阿媽細佬一齊住公屋，間屋已買，我媽自已搵到錢
，但基於要我地負D責任關系都要我地比少少家用，咁我媽要我比兩千當交租的，因為欠債都搞到有時會遲左比，我報支出時照報供養母親，銀碼稍為報返大d例如4千，可以嗎，因都預左佢還價，但會否因為我母親有工作(自顧)，而唔批我供養母親呢筆錢？
供養4K 不易批. 唔知其他巴打點睇.

8. 最後一個問題，本人這兩年染上賭波，但會否對我申破有影響？

有影響!!!!!
好的影響.俾人問到點解老破,輸波馬股票有哂紀錄.
大家一望就知又係衰爛賭.
唔駛懷疑你收埋筆$$$$$
可惜在於你賭輸太細.如果借40萬,有紀錄輸錢30萬更加好!!!

siugangan

謝謝flypig ，咁等我抽時間去埋稅局搞

alan1alan

請問樓主咩事要申破....你好似未講欠款原因....
係馬會輸幾千幾千唔會輸大架...

Alex2233

真係好講比例

我埋單七十萬左右，最大既支出就係賭，之前仲有少量股票

但我損失果到接近條大數，馬會一個月玩10000-20000，澳門一次平均帶10萬/碌10萬

反之，你賭得細，條數又大，就要再問其餘去左邊

siugangan

慨然問到就補充返，破產不外乎大洗加自已造成，以前份工o係大陸工作左7年，製衣業(夕陽行業)都係搵萬零，後尾幾年人仔係咁升，份工出港幣，後尾同女友同居埋，支出就大左，開始借左循環貸款，果時都頂到，後尾工廠執粒，要落返黎香港生活，直頭要轉埋行，入左建造業訓練局學紮鐵，果幾個月每個月都係得6千幾津貼，唔夠洗就用份循環同信用卡透支，如是者捱到學成，出黎做叫做都搵到2萬一個月，但半身身體差，未夏天都做到見頭暈，頂唔訓做左3個月就辭左工，又搵左兩個月工，轉左行做電訊業，初初做都係搵萬零，果時已經差緊份循環同幾張卡數，都係還min pay,因為想還輕鬆d,就搵星展搞左一筆清拖長左黎還，但其實就算做左一筆清，一個月還6千幾其實都幾難捱，做果時份循環又冇同我cut到，卡又cut剩兩張，一大洗左又會透支，結果搞到又搞第二次清數，不過今次只清到細數，結果就係還錢就還多左擔子更加重左，只係暫時延遲左爆發，加上收入唔穩定左，就會又走去透支信馬卡捱時間，果時都未諗到破產，反而又做左清數，安信又做比我果度好野，用第3次o既數蓋左第2次果筆，係暫時舒緩左，但數目又大左，加上而家收入大減，咁就爆煲
而家差幾間數如下 (列出的都係本金)
星展 $23萬(供左兩年每月$6524)
UA循環7萬，個個月還min pay再提取
中銀信用卡 5萬5千左右，還min pay
渣打信用卡2萬2左右還minpay
安信 27萬，3個月前借的，用黎冚之前大新同中銀信用卡同渣打信用卡，實際到手3萬左右，捱左3期，每月要還7千，今個月都有還，但後面真係頂唔順了黎緊仲會爭多CSL 萬幾銀，因為3個號碼出機plan 都千幾蚊月費，打算破產就提早將電話號碼轉走左去第2間公司而家兩個號碼月費2百零蚊到

alan1alan

siugangan 發表於 15-1-2016 17:06
慨然問到就補充返

申破最麻煩就係問你借落既錢去左邊....

flypig

就咁，儘快盡量save 所有bank statement,債主statesmen.
愈長愈好。

siugangan

又諗起一個問題，我媽有幫我買保險，好似係有少少儲蓄，但我媽都提左幾次錢，份保險我媽幫我供的，個保險agent 係佢朋友，我實在唔想驚動我媽，我申破時可唔可以唔報呢樣當報漏？

alan1alan

siugangan 發表於 16-1-2016 11:23
又諗起一個問題，我媽有幫我買保險，好似係有少少儲蓄，但我媽都提左幾次錢，份保險我媽幫我供的，個保險ag ...

如果份保單持有人一開始係你媽媽的話, 就唔使擔心....法庭唔會cut呢D單...因持有人不是你.
但如果原本張單持有人係你, 呢幾年內轉左俾你媽媽, 就有問題.

siugangan

但佢用我名幫我買，幾次提錢都要我簽名，咁持有人應該係我，咁就煩

alan1alan

siugangan 發表於 16-1-2016 11:48
但佢用我名幫我買，幾次提錢都要我簽名，咁持有人應該係我，咁就煩

保單內分持有人, 受保人, 受益人...

多數保險公司受保人都要簽名的....
你可問返保險經紀你係邊一類....
或者你知道俾保費係用邊個戶口嗎? 通常過數戶口一定係持有人戶口.
如果份保單每月係你戶口扣錢, 咁你多數係持有人

siugangan

咁可能持有人都係我媽，我媽自已供唔經我的，受益人都係佢，我見有時有信寄黎檯頭係我名我以為我就係持有人

alan1alan

佢有可能交現金架。通常寄信收件人係保單持有人

siugangan

問左我媽佢話持有人係佢，希望佢冇搞錯

我要破產了

但去澳門賭錢輸左無紀錄...咁都得咩？

siugangan

我現時理解為個流程係填兩份表再去破署入紙排期高院，之後頒令後才要交文件同再填表，即係文件實質就頒令後才要交？當然我都會盡早安排，文件就要3年稅單，銀行戶口半年記錄，各債項的結單或合約，大致上係咪咁？

flypig

我要破產了 發表於 16-1-2016 14:40
但去澳門賭錢輸左無紀錄...咁都得咩？

得！！！！唔只一單添！！！

cc4321

樂觀睇你填幾多都得,悲觀睇批唔批唔到你話事,你要做好老公乖乖仔係一回件事,要睇主任/外判手鬆定手緊

hohochi

5. 因為申破唔想比屋企人知，另本人已申請郵政信箱，已寄信比我叫我去拎匙，準備一拎到就申請埋郵遞轉寄，但我驚申請到轉寄前破產局就寄信比我，想問一般是否頒令後才會有信寄比我？
<~~自行申破係頒令(即上庭日)前係會收到破署信通知你上庭日期，信封上會有個好大個架破署LOGO


8. 最後一個問題，本人這兩年染上賭波，開始都贏，當然之後都輸啦，咁用開馬會流動投注戶口，經銀行轉錢入落個戶口賭的，即係銀行月結單個個月都會有幾筆Hkjc 過數顯示出黎，雖然賭得唔算大，每次幾百幾百咁但一個月加起上黎都過千，呢個唔算我破產主因，但會否對我申破有影響？我網上查過好似係自已做生意而又賭先會犯刑事，同埋我係咪要入紙前就去馬會取消左個戶口佢？

<~~入紙前取消左佢，到交文件時都有要求要提交馬會戶口取消信