老破差不多三年,到最後一年始終要面對現實了。 話說三年前老破就去申請綜援,當時失業又有長期病患,所以先行上呢條受盡岐視之路。由於我又未夠六十歲所以就硬性要去參加"自力更生計劃",每月兩次去見社署外判(又係外判!)出去既社區中心就業主任,每次去要交一份報告,報告最少要填兩份工,證明有去搵野做,重要每星期做三日既"工作體驗"。我每次都準時去見就業主任同交報告,而且個就業主任都幾好人,態度友善。而"工作體驗"就一次都冇叫我去做。 不過到左今年原有既外判社區中心同社署既合約完結,我就派去另一間外判社區中心。起初都無乜野,但係到左四月就要我去上佢果d"改善工作xxx課程"(名唔太記得) ,佢話唔上唔得。OK,上就上,上果三日朝十晚六既堂悶L到HiHi。以為咁就完啦!點知上月又換左主任,係女人,八婆一個!去左兩次,見親都話有冇去做"工作體驗"。我話冇,因為我有長期病患唔可以做體力勞動工作,佢就冷冷的說 : 盡量啦!點知到左一個星期六收到信叫我來緊既星期一去某某運動場剪草!叫我三十幾度係球場暴曬六七個鐘,重要做咁體力化既工作咪即係叫我去死!重要只有兩日通知!由於係星期六,打去搵果個主任又放左工,只有一個職員答我 : 由於同事出左少少問題所以先通知得你咁急,不過如果你唔去就要扣一半綜援金。 睇到呢度大家都會話,不如出去搵份野做重好啦。係呀!做得剪草不如去佳寶做份理貨人工都高過佢啦。但我自問體力真係頂唔順,所以我一直搵工都係搵文職。 而家我打算唔攞綜援了,不過來緊既日子將會係好似我係大海入面連唯一既水泡都冇埋,真係好徬徨!但係總好過對住個八婆!忠告大家一句: 攞綜援並唔係外人咁諗咁好,世上無免費午餐。 |