明早開債權人大會

MichaeLXXX

其實九月已經申破，上埋庭，跟住上去一間會計師樓交晒啲文件，十一月都收埋張破產令到上兩個禮拜先收到信要出席呢個會，開頭都覺得好怪，事原收到一封信件係啲律師樓寄來（佢又會知道我地址），知我要開債權人會議（點解佢會知呢？），我當時都“諗爆頭”，上完律師樓交晒文件，每個月都有fax收入俾主任，仲有乜野要傾呢？

小弟欠邦x 約20k 獅子的卡數加循環約 16k 大×银行 約19萬 ，唉月入一萬加partime 先11k多啲，開頭去律師樓傾都話唔駛還，唔通上去又有變數？呢兩個禮拜都心實實，今日上黎破聯睇睇啲師兄咁講，上去好似開旅行茶點會，心情都放鬆少許！

不經不覺過左接近半年，無咗啲欠債響身其實心情係輕省咗，以前月頭已經計住啲錢要點還債，依家係無乜剩錢，不過唔好太大花費起碼足夠生活。自問不煙不酒也不賭，我諗時間好快就過。希望破聯上下盟友都生活愉快，亦鼓勵當中灰心及失意的朋友，陰天過後必有晴天的，多點上黎論壇“取經”，好過終日胡思亂想，我相信好多盟友都樂意出手相助（文字上）！

smallcat

其實債權人人會議, 係 債權人如某大老虎銀行, 咸生, 強銀, 獅城展, 都可以要求開債權人會議而掟你去佢地想你跟既外判的

以前一般係  主任先跟 ( 交文件可能係會計C樓或外判律B樓 ) -- > 債權人會議 --> 外判

依家唔通變左   外判 -- > 債權人會議 --> 第二任外判

hohochi

smallcat 發表於 16-1-2015 00:15
其實債權人人會議, 係 債權人如某大老虎銀行, 咸生, 強銀, 獅城展, 都可以要求開債權人會議而掟你去佢地想 ...

應該仲係呢個主任先跟 ( 交文件可能係會計C樓或外判律B樓 ) -- > 債權人會議 --> 外判
因去會計C樓或外判律B樓到交文件時已經傾初步果生活費

hohochi

我早你兩個月到六月破，10月開債權人大會，12月見外判,加油

MichaeLXXX

我都係傾左生活費，都過左半年先黎開會，成日收到破署啲信都好困擾，其實屋企人都有問發生乜事，止不過我死口唔講，我都有擔心佢拆我信睇，不過屋企人好尊重我，暫時無乜野發生過。

keing81

MichaeLXXX 發表於 16-1-2015 11:05
我都係傾左生活費，都過左半年先黎開會，成日收到破署啲信都好困擾，其實屋企人都有問發生乜事，止不過我死 ...

我都把信件轉左第二到收~~破產3個月, 不停收到破署信件, 收到驚啊, 但我相信都過左呢幾個月應該吾會再收到~~要查要問都覆晒了~

ireneeneri

我二月六都要上去債權人會，好唔安落

smallcat

hohochi 發表於 16-1-2015 01:52
我早你兩個月到六月破，10月開債權人大會，12月見外判,加油

  依家D"錢莊"條氣唔順  只好睇開D

smallcat

ireneeneri 發表於 16-1-2015 19:48
我二月六都要上去債權人會，好唔安落

凡事睇開D  人生總有起跌  記住吸取今次教訓  不一定是壞事

MichaeLXXX

今日上完，有少少分享：
（1）約1130開會，1145都未點名……
（2）主任講幾句開場白，之後就叫人出去講話係邊間同邊間銀行委託邊間律師行去跟進（即係外判）然後簽字確認
（3）律師行果邊都係講幾句，最主要都係話黎緊見面要帶乜乜文件，仲有傾完之後有機會要還錢之類

其實想講過程不用十五分鐘就走得，債權人一個都無到，委託人就有三間律師樓，黎緊又要傾生活費，不過都無得諗要唔要還，開初跟主任話唔駛還，我又點會突然有餘錢還，哈哈

smallcat

MichaeLXXX 發表於 17-1-2015 01:00
今日上完，有少少分享：
（1）約1130開會，1145都未點名……
（2）主任講幾句開場白，之後就叫人出去講話係 ...

跟主任唔使還, 跟外判好多時要還, 因為外判批既生活費相對緊

唔係債權人點會攪咁多野, 做大龍鳳要開武林大會, 就係想你還得幾多得幾多

即係以前你條毛巾濕濕地, 用個正常人扭唔出水, 依家用大力士去扭D水出來, 扭得一滴得一滴