|
大家好,我係新手準備入學,想同大家分享下哩個幾月既感受.
本身自己TU財有5條數,Aexn, UB, X銀包, Cash專業, Kx加埋廿幾個
另外有30間二三線,扣唔扣底都有,仲有10幾條電數,共欠87萬幾。
点解借到咁多?一黎中介啦,教你点報數,又有啲爬文話易批上去又批,
又有啲有分會,初初還到又還得好,又射左我去果邊。
啲錢用左去邊?初初係鐘意買野,然後越借越多,停左買野,就變左入不敷支,
要數冚數,我唔係買咩名牌手袋,只係可能食野食好啲、買下小飾品咁.
初初未有電數時,仲頂得住,然後借左第一條電數,7日還$300,到10幾條每星期還成皮野,
日日放工仆去入數,間間5点前食錢機、轉賬,星期一至六都要入,就諗緊為咩咁辛苦.
然後把心一橫,過年前夜晚係屋企執好晒野,第二日就走左冇返屋企,
當然即晚電數炸爆諮詢人,淨係果晚我媽同親友幫我還左近十皮電數,
而我出去租左間屋住,年初四就去律師樓申請破產,哩段時間家人日日比人炸電話,
一日最多400幾個,又拉入Group,又收恐怖相,最後仲淋埋油。過左個幾月,
而家電話係小左,有信寄黎,仲有啲恐嚇話會做野.
最想講係,初初我媽唔聽我電話,到而家佢日日都打黎聽下我把聲睇我死左未,
問我有冇錢駛,前排凍問我有冇衫着,仲幫我返屋企攞(我地一齊住)
果下真係唔識講感受比大家知.
現在只希望法庭快啲開返,早啲頒領,再搵返份工還錢比家人,
都勸告下日日要跑數既兄弟姐妹,搞唔掂要早啲同家人坦白,趁早舉手.
早日脫離苦海.
|
|