破產聯盟

標題: 舊人報到.... [打印本頁]

作者: mickey7100 時間: 21-10-2013 13:00
標題: 舊人報到....
好耐冇上嚟,之前公司部機BLOCK咗唔俾入舊網,跟住開始忙,就一直都冇入過,最近再試吓係YAHOO度SERACH就搵番呢度,最緊要係可以入到

到今年12月就3年,前2年都好平平靜靜咁就過咗,到今年年頭就開始有變,先係離開舊公司,公司有啲變動,為免份長期金冇哂就自己辭職,轉咗去另一間公司,人工亦多咗小小,跟住無幾耐就收到信派到公屋,但要還原,所以冇咁快收樓.
份工終於過咗試用期,即時連新合約SEND咗去外判,亦通知埋已派到公屋,但因要維修,仍未知幾時可搬.個陣時因為新工比較忙,再加埋得自己一個攪間裝修既嘢,一時冇為意要打去約外判上去當面傾,因為之前2年都係就咁FAX份年結上去,有問題佢地會打俾我(第一年我填咗負數,佢地打嚟同我講唔可以填負數),所以個腦完全無意識要搵佢地,可能因為之前太平靜,有時真係唔記得咗自已係已破人士

最近終於攪惦哂所有嘢,亦終於醒覺要打個電話俾佢地,當然第一句緊係俾仍地吋「咁唔得喎,你應該第一時間上嚟傾」,我緊係扮哂死狗咁say sorry話真係唔知,跟住話一個月後先有期,到時預咗俾佢話,亦預咗要還番啲錢,因之前一直都負數,根本冇得還,但租金真係小咗好多,所以只希望唔好減咁多生活費,到時有咩進展會再上嚟報告

作者: dopod123 時間: 21-10-2013 13:52
好事多過壞事，有公屋，未來解破後都好

作者: smallcat 時間: 21-10-2013 15:43
恭喜晒, 有間公屋有個居所先

作者: 清風 時間: 21-10-2013 19:26
恭喜哂，轉左新工，人工又多左少少，又有間新公屋，解決左居所問題，未來都會係好好......

作者: lulumason 時間: 21-10-2013 20:53
比心機捱埋這1年啦不要太擔心了

作者: flypig 時間: 21-10-2013 21:44
有公屋等於執左過百萬.
恭喜!!!!!!!!!

作者: mickey7100 時間: 22-10-2013 12:34
派咗公屋個心真係定好多,因為租金真係佔生活費最大既一份....

作者: super_skuller 時間: 22-10-2013 14:37
首先恭攞到公屋。無論點，捱埋呢年就有好日子過

作者: 唯一 時間: 22-10-2013 14:53

首先恭攞到公屋人工加了。得閒上多d 來。我剛剛開始

作者: mickey7100 時間: 23-10-2013 10:40
多謝大家,諗番當時真係好迷茫,連去搵律師都好似做賊,好驚俾人知,跟住搵到呢個網,睇哂啲舊文,個心開始定啲,跟住一步一步咁攪手續,到依家差唔多就過咗3年,有人問我究竟有冇咩影響,講真對我真係無咩大影響,工作上老細亦知道哂我既情況,所唔唔驚外判會通知,信箱亦收小好多垃圾信,最重要係心情輕鬆咗好多

當然我唔係鼓勵大家行呢條路,雖然冇大影響,但小影響都一定有,唔方便都一定有,但當冇其他路可以行,呢條都唔係一條絕路

作者: eddy 時間: 25-10-2013 13:10

作者: mickey7100 時間: 21-11-2013 12:50
今日終於上咗去重新再填份支出表(佢地唔係講傾生活費),個女仔好COOL,起初都有啲驚,但一開始佢就好快咁每一項問幾多錢,講幾多填幾多,當然都係要合理啦,反而冇好似第一次咁話要減,好快就填完

最後我問今年份年結係咪已開始用呢個最基礎,佢話係,跟住我話因房署既維修問題,我好遲先入得去住,中間要2邊交租,可以點填,佢話總之全年計,你填到2邊收支平衡就可以,行出門口個刻有啲鬆哂既感覺

作者: devilfish 時間: 21-11-2013 16:26
唉。。。有公屋真係幸福！

歡迎光臨破產聯盟 (http://hkiva.org/)